«Районну яшаву» охувчуларыны разилигин къазана

Бугюнлерде «Районну яшаву» деген район газет чыгъагъанлы 65 йыл тамамланды. Белгили агьвалатгъа байлавлу болуп район администрацияны жыйынлар залында шо юбилейге багъышлангъан шатлыкъ жыйын къуванчлы шартларда оьтдю. Жыйынны да «Къарабудагъгент район» деген муниципал къурулувуну башчысы Магьмут Амиралиев ачды ва юрютдю.

– «Районну яшаву», гертиден де, арадан оьтген вакътини ичинде оьз халкъы булан байлавлукъда сыйлы борчларына намуслу кюйде янашып, шулай абурлу чагъына етишгени сююндюре ва гележек учун да инамлыкъны тувдура, – деп башлады, шатлыкъ жыйынны ортакъчыларын оьтгерилеген юбилей булан къутлай туруп, М.Амиралиев. – Шо вакътини ичинде газет атын бир нече керенлер алышдырса да, башгъа-башгъа редакторлар, яратывчулукъ къуллукъчулар чалышса да, олар оьз борчларын ярты ёлда къоймагъан. Шо саялы да оьзюм де, гетгенлени эсделигин гьюрмет  булан эсге ала туруп, ону гьалиги редактору Магьамматмурат Канзитдиновгъа, савлай коллективине гьакъ юрекден разилигимни билдиремен ва уьстюнлюклер ёрайман. Охувчуларына да анадаш газетине гьюрметли кюйде янашагъаны учун баракалла болсун.

Магьамматмурат Канзитдинов да оьзюню сёйлевюнде район газетни биринчи редактору Хизри Гьажиевни, сонггъу йылларда ишлеген Магьаммат Салигьовну, айры- айры яратывчулукъ къуллукъчуланы абурлап къоймай, олар тутгъан ёл якълав табагъаны гьакъда разилик булан эсгерди.

– Тюнегюнден-бугюнге ва бугюнден-танга­лагъа деген байлавлукъ «Районну яшавунда» оьмюр сюрегени бизден де гьасил бола, – деп узатды ол оьзюню сёзюн. – Озокъда, газет янгыз районну яшаву, масъалалары булан дазуланып къалмай,  о – бизин савлай дюньягъа гёзлерибиз ачагъан хас къуралыбыз. Шо ишде борчларына намуслу кюйде янашагъан ерли мухбирлеге, охувчуларына яхшы ёл ёрамакъ магъа да парздыр. Къайсын-бирин айта­йым, газетде чыгъарылагъан макъалалар кёп тюрлю рубрикаланы тюбюнде ерлешдириле. Тезгилерине,  гьалиги заманны талапларын гьисапгъа алып, янгылары къошула. Шоланы арасында «Савлукъ сакълав», «Билим берив», «Маданият», «Адабият», «Агьамиятлы проект», «Халкъ – терроргъа къаршы» деген руб­рикалар булан бирче «Яшланы бокъчасы» да оьз ерин тапгъан. Мен янгы иш башлайгъан вакътиде газетни тиражы 1 минг эди буса, гьалиги заманда 2600-ден кем тюгюл. Охувчуланы барысыны да талапларын гьисапгъа алып, газетни ишин камиллешдиривде янгы асувлу къайдалар ахтарыла ва танглана. Дагъысын айтмагъанда, артдагъы йылларда «Районну яшаву» яратывчулукъ касбу конкурсланы эки гезик оьр савгъатларына ес болгъан.

Ерли газетни байрам шатлыкъларында ортакъчылыкъ этген къонакълар – Дагъыс­танны печат ва маълумат министерлигини вакили Болат Зайналабитов, «Ёлдаш» газетни баш редакторуну заместители Къарамагьаммат Къараев, «Тангчолпан» журналны редактору Супиянат Мамаева, район больницаны баш врачы Гьайбулла Шагьманаев, Паравулдагъы 3 номерли орта билим берив школаны директору Алимагьаммат Мусаев ва оьзгелери де «Районну яшавуна» яхшылыкълар ёрады, пайдалы таклифлер берди.

Къарабудагъгент районну Жамият палатасыны  председатели Абсамат Гьажиевни сёйлевю де жыйылгъанланы айрыча тергевюн тартды демеге ярай. Неге десегиз, ол тил, топуракъ, милли маданият масъалаланы гьакъында эсгере туруп, оланы агьамиятлыгъын ачыкъдан ташдырды.

– Гьар къумукъ учун къумукъ тилде чыгъарылагъан китап, газет, журнал болсун дегенлей, гьар къайсыбызгъа да биринчи савгъат экени гьакъда унутмай, гьюрметли кюйде янашыв яшавубузда сыйлы борч болма тюше, – деп тамамлады оьзюню сёзюн А. Гьажиев.

Шатлыкъ жыйынны ахырында ерли газетни гьалиги чалышывчулары район ва рес­публика оьлчевюндеги савгъатлагъа ес болду ва янгы савгъатлагъа гёрсетилди.

 

Бизин мухбирибиз.

СУРАТЛАРДА: юбилей шатлыкъдан гёрюнюшлер.

Авторизация
*
*
Регистрация
*
*
*
Согласны с условиями сайта?
Генерация пароля