– Бизин филиал аслу гьалда ватандашланы уьйлерине техпаспортлар бере. Уьйлени ва квартирлени проектлерин эте, топуракъ участкаланы, сатыв-алыв, васият этегенде багьаларын токъташдыра. Районда яшайгъан ватандашлар уьйлерини проектлерин алышдырма сюйсе, шо ишлени де бизин инженерлер кюте.
– Уьйню техпаспортун нече гюнден этип боласыз?
– Биз ватандашланы къуллукъларын заманында кютебиз. Уьйню техпаспортун биз олагъа онглу заманда барып еринде тапшуруп болабыз. Чалт алма сюегенлер де кёп бола. Бизин инженерлер оланы къуллукъларын аз заманны ичинде кютме бола. Он гюнден бир айгъа ерли болжалда уьйню техпаспортун берип болабыз.
– Районда 150 минг адам яшай. Сизге оланы талапларын кютмеге тынч чы болмайдыр?
– Дагъыстанда Хасавюрт район инг де уллу районлардан деп санала. Мунда бугюн 42 юрт бар. Озокъда, кютюлме герек ишлер де кёп. Болса да, бизин филиалны къуллукъчулары ишин намуслу кютелер. Заманында райондагъы юртлагъа барып уьйлени оьлчеп, багьалап болагъанны айрыча эсгерме сюемен. Оьтген йыл 22767 уьйню багьалагъанбыз. Айтагъаным, дагъы да кёп уьйлени багьалама болабыз.
– Сизин филиалны директору гьисапда районда яшайгъан ватандашлагъа не таклифигиз, ёравугъуз бар?
– Бир башлап тизилген уьйню техпаспорту болма герек. Шо болмаса, уьйге газ, сув, ярыкъ тартма ихтияр берилмей. Шону англама сюймейген ватандашлар кёп ёлугъа. Олагъа законну бузма бирев де ихтияр бермежек. Экинчилей, яшавда нече тюрлю табии балагьлар, от тюшювлер бола…
О заман уьйлени техпаспортлары ёкълар сонг чабып айланалар. Ахырынчы гюнде техпаспорт этдирме сюегенлер де бола. Мен олайланы заманында токътатаман. Законну бузма ярамайгъанны олар да чы билме герек эди. Амма уьйню техпаспорту болса, шо балагьлардан сонг кёп масъаланы чечип бола. Компенсацияланы алма имканлыкълар барын айтма сюемен.
Уьчюнчюсю – уьйню еси гечинген сонг уьйню техпаспорту ёгъу белгили бола. Ону яшлары варисликни этип болмай инжинелер.
Бизин къуллукъчуларыбыз юртларда кёп болалар ва шо гьакъда олар булан англатыв ишлер юрютелер.
Автор: Измулла ГЬАЖИЕВ.
Автор чыгъаргъан сурат.
