Кёкюрек аврувну алдын алмакъ учун

Инг алда кёкюрек аврувну ахтарагъан республика диспансерини ёлбашчысы А. Адзиев жыйылгъанланы алдына чыгъып сёйледи. Ол оьзюню сёйлевюнде кёкюрек аврувну яйылывуна байлавлу бизин республикада тувулунгъан гьалгъа айрыча агьамият берди.

          Ону сёзлерине гёре, бизин республикада кёкюрек аврувну алдын алмакъ учун мекенли шартлар яратылгъан. Шону булан бирге бир тюрлю кемчиликлер де ёлгъа йибериле. Ачыкълашдырып айтгъанда, кёкюрек аврувгъа къаршы вакцина (БЦЖ, БЦЖ-М) янгы тувгъан яшлагъа яшавуну башлапгъы гюнлеринден тутуп этиле.

        Шолай, савлай республиканы оьлчевюнде алгъанда, оьтген 2015-нчи йылда янгы тувгъан яшлагъа барысына да дегенлей яшавуну биринчи гюнлеринде кёкюрек аврувгъа къаршы вакцина этилген. Тек оьзлени дин къаравларына гёре яшларына кёкюрек йимик къоркъунчлу аврувгъа вакцина этмекни гери урагъан, шолайлыкъда авлетлерини савлугъуна къоркъунчлукъ тувдурагъан ата-аналар да бар. Бизин республикада оьтген 2015-нчи йылда 586 адам оьзлени авлетлерине кёкюрек аврувгъа къаршы вакцина этмеге къоймагъан. Шо гьалны гёз алгъа тутуп, ерлерде иш гёреген савлукъ савлав идараларда чалышагъан педиатрлар янгы тувгъан яшланы аналарыны арасында англатыв юрютювге айрыча агьамият бере.

          Шондан сонг, кёкюрек аврувну ахтарагъан республика диспансерини яшлагъа ва яшёрюмлени багъагъан бёлюгюню ёлбашчысы З. Агьматдибировагъа сёз берилди. Ол кёкюрек аврувгъа къаршы вакцинаны этеген къайдалары гьакъда медицина къуллукъчулагъа баянлыкъ берди. Шону булан бирге, шо вакцинаны къайсы гезиклерде этмеге ярамайгъанын, олай да яшны савлугъунда не йимик заманлыкъ алмашынывлар болмагъа имканлы экенин ачыкъ этип айтды. Школа чагъына етишмеген яшлагъа ва билим берив ожакълагъа юрюмеге башлагъан яшлагъа кёкюрек аврувгъа къаршы вакцина этивге айрыча тергевлю янашмагъа тюшегенин билдирди. Савлукъ сакълав идараларда да сабий чагъындагъы яшлагъа вакцинаны этегенде тазалыкъны ва оьзге гёрсетивлени гесимлерин толу кюйде яшавгъа чыгъармагъа тюшегенин ташдырды.

          Шондан къайры да, республика диспансерини фтизиопедиатры Ж. Замированы сёйлевю де жыйылгъанлар учун пайдалы болду. Ол кёкюрек аврувгъа къаршы этилеген вакцина этилген яшлар шону къабунувундан якъланагъаны гьакъда айтды. Кёкюрек аврувну малим этивню къайдаларына байлавлу медицина къуллукъчулагъа таклифлер берди.

     Насрулла БАЙБОЛАТОВ.    

     

Авторизация
*
*
Регистрация
*
*
*
Согласны с условиями сайта?
Генерация пароля