Ишин билеген адам

Бугюн оьзюню гьакъында къысгъача хабарлама сюеген Вазирхан Адилханов да гьакъ юрегинден танглагъан иши булан тезден долана, шону гьали де къоймагъан. Оьзю шагьарда тувса да, ол сав эсли оьмю­рюн юрт ишге багъышлагъан. Балики, ­огъар атасы Адилхан Вазирханович о йылларда Буйнакск шагьардагъы юрт хозяйство техникумда ишлегенлик таъсир этгендир, агроном касбугъа бакъгъан гьасиретликни де ол тувдургъандыр.

Гьасили, школаны битдирген сонг, Вазирхан Хасавюртдагъы юрт хозяйство техникумну агроном бёлюгюне охума тюше. 1958-нчи йылда ВЛКСМ-ни сыдыраларына къабул этиле.

Шонда охувун тамамлап, къолуна диплом алып, жагьиллей иш башлай. Башлап Бабаюртдагъы Кировну атындагъы колхозда овощлагъа ва емишлеге къарайгъан агроном болуп чалыша. Шо ишге аз заманны ичинде тюшюне, яхшы иш гёрсете. Оьзюню гьаракаты, жигерлиги булан юртлуланы арасында абур къазана.

1964-нчю йыл Вазирхан Адилханович Буйнакск шагьаргъа къайта ва агрохимия лабораториягъа ишге къабул этиле. Сонг ол Буйнакск райондагъы «Шура» совхозда агроном болуп чалыша. 1965-нчи йылда ону партиягъа къабул этелер.

Къайда ишлесе де, В. Адилханов оьзюню ишин тындырыкълы кюйде кютеген сынавлу касбучу гьисапда арагъа чыгъа. 1974-нчю йылдан башлап, В. Адилханов оьсюмлюклени къоруп сакълавну район станциясында загьмат тёге. Шо идарада болгъан алышынывлардан сонг, янгы яратылгъан «Россельхозцентр» деген управлениени район бёлюгюню начальниги этилип белгиленген.

Ону ёлбашчылыгъы булан 70-нчи йылларда оьсюмлюклени зиянлы жанлардан ва аврувлардан къоруп сакълавну асувлу, янгы къайдалары къолланма башлай. Бары да ерде шо иш илмуну янгылыкъларына гёре яшавгъа чыгъарылып тургъан, авлакълардагъы ва емиш бавлардагъы оьсюм­люклени къорумагъа тюзевлю чаралар гёрюлген.

В. Адилханов бавларда болагъан зиянлы жанланы ва аврувланы яйылма къоймай, алданокъ профилактика ишлер оьтгеривню бек агьамиятлы деп гьисап эте. Шолай этилсе, чачывланы къорума, гелимин артдырма бажарыла. Ол оьзю де гьай этип ва башгьа юрт хозяйство касбучуланы да къуршап, хозяйстволаны ёлбашчыларына кёп кёмеклер этме бир де авурсынмай, емиш тереклени, гюзлюклени ва башгъа оьсюмлюклени заманында тергеп чыкъмагьа, не дарман урма герекни англатмагъа къарай. Чачылагъан урлукъланы сан яны нечик экенни тергевге де кёп агьамият бере.

«Россельхозцентрны» район бёлюгюню начальниги Вазирхан Адилханов ва ону иш ёлдашлары оьзлени чалышывунда илмугъа асаслангъан янгылыкъланы да къоллай, оьсюм­люклени къорувда юртлардагъы фермерлеге, агрономлагъа ва ижарачылагъа оьз заманында англатывлар, насигьатлар берип, оланы билимин, англавун артдыра.

«Россельхозцентрны» Дагъыстан Рес­публикадагъы бёлюклерини арасында В. Адилханов ёлбашчылыкъ этеген бёлюк лап яхшысы деп гьисаплана. Ол оьзюне де, иш ёлдашларына да талаплы янаша, айсениликге, жавапсызлыкъгъа ёл бермей. Кёп йыллар ишлеп бай сынав топлагъан касбучу оьзюню билимлерин, сынавун яш касбучулагъа да малим эте.

Юрт хозяйство производствону оьсювюне яхшы къошум этгени учун огъар оьз заманында «Дагъыстан Республиканы юрт хозяйствосуну ат къазангъан къуллукъчусу» деген гьюрметли ат берилген. Кёп йылланы узагъында намуслу кюйде ишлейгени саялы Россия Федерацияны юрт хозяйство министерлигини грамоталары булан бир нече керенлер савгъатлангъан.

Кёп йыллардан берли Вазирхан Адилханович уьягьлюсю Умзагьрат булан Атланавул юртда яшап тура. Олар беш яшны, демек, эки уланны ва уьч къызны оьсдюрген. Олагъа яхшы тарбия ва оьр билимлер берген. Бу агьлю дослукъда-татывлукъда яшайгъанлы узакъ йыллар бола. Оланы уллу агьлюсю: бары да дос-къардашы, авлетлери ъ ва оланы да яшлары оьзлени арив яшап, яхшы ишлеп абур къазангъан уллуларыны бек хадирин де билелер.

Гетген гюзде Буйнакск районну 90 йыллыгъын байрам этегендеги шатлыкълардан сонг да огъар, уьлгюлю узакъ заманлыкъ иши саялы, бирдагъы керен Россия Федерацияны юрт хозяйство министерлигини Гьюрметлев грамотасы тапшурулду.

А. ЗАЛИМХАНОВ.

Суратда: Вазирхан Адилханов.

Авторизация
*
*
Регистрация
*
*
*
Согласны с условиями сайта?
Генерация пароля