Ону барышында Дагъыс­танны журналистлерини союзуну ёлбашчысы Али Камалов журналистлени чалышыву жамият арада агьамиятлы ерни тутагъаны гьакъда билдирди. Оьзлени касбу борчларын кюте туруп, олар яшавда болуп турагъан агьвалатлагъа байлавлу халкъ арада дурус пикру яратмакъны къастын болдурагъанын ташдырды. Шону булан бирге, бугюнлерде де алдын йимик журналистлени ихтиярларын къыйыкъсытывлагъа ёл берилегени гьакъында айтды. Ол гюнлерде журналист Шамил Абашиловну ва ич ишлер къурумларыны къуллукъчуларыны арасында тувулунгъан эришивлюк шону герти кюйде исбатлайгъанын эсгерди.

Шондан сонг Шамил Абашилов оьзюню сёйлевюнде шо эришивлю гьал тувулунгъан шартланы ачыкъ этди. Ол билдирген кюйде, май айны 12-синде Магьачкъала шагьарны орамларыны бирисинде оьзлени енгил автомашинин ёл юрюшню низамына къарай­гъан къуллукъчулар тергев оьтгермеге токътатгъан. Машинни гьайдавчу ва ону ёлдашлары ич ишлерини къуллукъчуларына касбу борчларын кютмек учун бир де пуршавлукъ этмеген. Шогъар да къарамайлы, машинни токътатгъан полицияны сержантлары Арсен Мирзабеков, Рашит Закавов ва Жамал Къурбанов олагъа эдепсиз, менлигине тиеген кюйде сёйлемеге башлагъан, гьатта машинден тюшюп, орамгъа чыгъып токътамакъны да талап этген. Оьзю журналист экенин исбатлайгъан шагьатнамасын гёрсетсе де, Шамил Абашиловгъа бакъгъан якъда олар оьзлени айрыча хатирсиз тутгъан. Ол болуп турагъан агьвалатланы, тарыкъ болса, дуруслугъун исбатламакъ, инг башлап оьзюню аманлыгъын болдурмакъ учун оланы видеогъа язып алмагъа башлагъанын гёргенде, гюч булан ону къол телефонун чыгъарып алгъан. Шону булан бирге къол телефондагъы видеону ва шогъар язылгъан адамланы атларын барысын да бузуп да тайдыргъан. Шондан къайры да, эгер ихтиярлары къыйыкъсытылагъаны гьакъда сёз юрютюп турса, ону аты ич ишлер къурумларындагъы террорчулукъ гьаракатгъа къуршалгъан жинаятчы уьюрлени вакиллерини сиягьларына язылажакъ деп де къоркъув берген. Адамны эсин тайдырагъан мадданы ону бетине багъып эки керен де сепген. Шолайлыкъда, сонггъа таба медицина къуллукъчулар токъташдыргъангъа гёре, жабаргъа йыгъылагъанда ону савлугъуна зарал болгъан.

Ич ишлер къурумларыны къуллукъчулары Шамил Абашиловну Магьачкъала шагьарны Ленин районуну ич ишлер бёлюгюне етишдирген сонг, ол жамият низамны бузгъан деп айыплангъан. Бизин республиканы тахшагьарыны эсгерилген районуну суду шо эришивлюкню шартларын ахтаргъан ва Ш. Абашиловну тувулунгъан гьалда айыплы тюгюл экенин токъташдыргъан. Журналистни ва ич ишлер къурумларыны къуллукъчуларыны арасында эришивлюк болгъан ерни ювугъунда ерлешген яшавлукъ уьй видеогъа язып алыв алатлар булан ясандырылгъаны судда гьакъыкъатны токъташдырывгъа болушлукъ этген.

Оьтгерилген судну генгешинде Шамил Абашиловну ихтиярларын якълагъан адвокат Биякъай Магьамматовну сёзлерине гёре, журналистлени ихтиярларын къыйыкъсытывланы гележекде алдын алмакъ шу эришивлюк гьалны малим этивге агьамият берилегенини аслу мурады болуп токътай. Мухбирлени соравларына жаваплар бере туруп, ол эсгергени йимик, оьзлени касбу борчларын гьатдан озуп кютген ич ишлер къурумларыны къуллукъчулары Арсен Мирзабековну, Рашит Закавовну ва Жамал Къурбановну чалышывуна бакъгъан якъда бугюнлерде ахтарыв юрюле. Олар гьалиге оьзлени ишлерин сакълагъан. Сынав гёрсетегени йимик, ич ишлер министерлигини ёлбашчылары да касбу борчларын тийишли даражада кютмейген къуллукъчуларына бакъгъан якъда немкъорай янашып къоймай. Тек Арсен Мирзабеков, Рашит Закавов ва Жамал Къурбанов Магьачкъала шагьарны Ленин районуну судуну гьукмусу булан рази болмай къалмакъ да бар.

 

Насрулла БАЙБОЛАТОВ.

СУРАТДА: прес-конференцияны ортакъчылары.