Гьалиги заманны къызлары кимлердир?

Гелигиз, бир башлап «гьалиги заманны къызы» деген англав недир ва олар кимлердир, шону билмеге къарайыкъ. Тюзю, «гьалиги заманны къызы» деген англавну инкар этмеге бажарылмайгъан бир яны бар. Гьалиге бирев де яшавда болмайгъан, янгыз «татывлу яшавну» гьакъындагъы ёммакълардан алынгъан къызъяшны суратламагъан. Бу ерде бизин бугюнгю охувчу, оьзюню охуву, загьматы, ишлери булан машгъул болагъан студент къызны гьакъында айтабыз. Гьалиги къыз ким экени ачыкъ. Ол оьзю нечик хасиятлы адамдыр?

Озокъда, жаваплар бары да къайсы къызны гьакъында айтылагъанына гёре  бола. Дагъы кюйде болмагъа да бажарылмай. Къайсы буса да бир адам нечик ойлашагъаны  тюгюл, неге шолай деп айтагъанын токъташдырса яхшы. Шолай болмаса, анкет маълуматлар ойлашылып айтылгъан пикругъа ва ишни герти гьакъыкъатына къыйышагъанын яда къыйышмайгъанын билмеге къыйын. Не этмеге герек, анкетлени авторлары белгисиз, гётерилеген масъала гючлю, оларда ачыкъдан-ачыкъ сёйлемек учун эркинлик берилмеге герек. Нечик болгъанда да жаваплар къаравулланмагъан кюйде, бир-бирине къаршы чыгъагъан, бек ташдырылып айтылагъан, масхара  къайдалы, илиякълы яда ачувлу, яшавда топлангъан бай сынавгъа кюрчюленген яда яшлыкъдан язылгъан бола. Олар бары да оьзлени уьстюнде ойлашма борчлу эте.

 

Къызланы оьзлени гьакъындагъы пикрулары

 

Гьалиги заманны къызы болмакъ–жамият ишлерде актив кюйде ортакъчылыкъ этмек.

Гьалиги заманны къызы болмакъ–инг башлап билимли, гьар якъдан англавлу, кёп китаплар охугъан, хыйлы масъалаланы, гьар якъдан  билеген, бажарагъан болмакъ.

Гьайлы, тергевлю, саламат, яхшы, илиякълы, бираз уялчан болмагъа герек.

Гьалиги заманны къызында тиштайпалагъа хас илиякълы хасият болмагъа тюше, албаслы къатынгъа ошап турма ярамай, гьакъыллы болмагъа тарыкъ.

Гьалиги заманны къызы къоччакъ, бир муратны алдына салып, огъар етишмек учун гьаракат этеген, къастлы болмагъа тюше.

Гьалиги заманны къызы демек, гьар якъдан англавлу демек бола.

Гьалиги заманны къызы болмакъ –модный опуракълар гиймек…

 

Къызъяшланы тенглилери – уланлар олагъа не багьа бере?

 

Гьалиги заманны къызы шат, илиякълы, гьайлы, къурдашына яда ювукъ адамына къыйынлы гюн гелгенде ташлап къоймайгъан, ёлдашыны хатирин къалдырма биревге де ёл бермейген, гьар къайсы темагъа да оьзю булан лакъыр этмеге бажарагъан болмагъа герек. Ол оьктем, намуслу, оьзюне ва ёлдашларына бек талап­лы болмагъа тарыкъ. Оьзюн бек артыкъ аявлайгъан, айтды-къуйтду юрютеген, кёп сёйлейген болмагъа тюшмей. Ойлашып, гьакъыллы кюйде лакъыр этип бажарма тюше. Оьзюню багьасын, абурун билмеге тюше.

Гьалиги къызлар бир заманда да бузламайгъан, булгъанмайгъан таза булакъ йимик болмагъа герек.

Гьалиги заманны къызы – герти адам, инамлы ёлдаш!

Бугюнюбюзню  къызы болмагъа къы­йын. Ол оьзюнде Наташа Ростованы, Люба Шевцованы хасиятларын бирлешдирмеге, бахчадагъы къаранчкъы йимик болмай, танылмайгъан гьалда боялмай, ягъынмай турмагъа тарыкъ…

 

Уллуланы гёзюнден къарагъанда

 

Гьалиги къызлар? Билимли, модагъа гёре гийинген, тек олар эпсиз енгил гьакъыллы, сайдан ойлаша. Оланы чагъында биз шолай тюгюл эдик.

Олар оьзлер сюйгенни болмаса этмейлер, тынглавсуз, ёнкю, тез хуйлана, оьз­лерден къайры гишини сююп бажармай, артыкъ бек билебиз деп эсине геле, ойлашмай сёйлей, оьзлер айтгъандан таймай..

Олар оьзлени бек аяй, шашый. Айтгъангъа тынглап, сёйлемей туруп болмай, саламат кюйде, аста булан лакъыр этип бажармай…

Ким айтагъан тюздюр? Къызлар оьзлеге бакъгъан якъда гьатдан озуп гьайсыз тюгюлмю? Ата-аналары да кёп чыдамсыз, янгыз яшавну бир янын алып къоймайлы, оьзлени къызларыны хасиятыны бир сама яхшы янын гёрмейми? Яш уланлар береген къыйматлар бираз башгъа, тек олар да артыкъ даражада ташдырып сёйлей. Бу ерде нече тюрлю кюйде айтыла, оланы къайсын якъламагъа герек?

Олар бары да, нечик айтылса да, бизин етишип гелеген къызларыбызны гьакъында айтылгъан. Биз къызларыбызны бек сюебиз. Бизин учун олар бютюн яшавда инг аявлу адамлар. Бир-бирде буса оланы онча да олай кёп сюебиз чи, гьатта оьзюбюзню сюювюбюз булан олагъа зарал да этебиз. Оланы сюйген кюйде яшама къоябыз. Биз оланы гийиндиребиз, гьатдан озуп гетебиз, бары да яхшы затлар бизин къызларыбызгъа болсун деп эсибизге геле. Сонг буса къызыбыз адамлардан эсе, китаплардан, инчесаниятдан, табиатдан эсе гьар тюрлю арив опуракълагъа  артыкъ тергев эте деп ачувланабыз, къыйналабыз.

Биз оланы гьар тюрлю аврувлардан, яшавда болагъан четимликлерден, янгылышлардан къоруп сакъламагъа къарайбыз. Сонг буса яшавдан англаву аз деп къыйналабыз. Олар учун бары да затны оьзюбюз этебиз, сонг олар эринчек деп къайнашабыз.

Бизин къызларыбыз ач-ялангъач болмакъ не зат экенин сезмеген. Шо саялы да олар аш гесекни хадирин билмей. Озокъда, олар языкъ болмай, насипли яшлар болуп оьсмеклиги бек яхшы. Тек яшав баргъан сайын алышына, четимлеше. Бары да зат тынч кюйде этилип къалмай. Бизин асрубузда социальный якъдан бек четим агьвалатлар кёп, дюньяда илму-техника оьсюв баргъан сайын чалтлаша…

Озокъда, гьали яшланы яшаву булан бирге оланы оьсювю де башгъачалай болгъан: акселерация! Гьалиги яшлар бийик де дюр, мол да. Олай болгъанда, яшлар тез де оьсе, англавлу, билимли, 50–60 йыллар алдагъы яшларындан эсе хыйлы артыкъ. Оланы яшавну хыйлы агьамиятлы янларындан бир де англаву ёкъ, тек билмеге бек къаст этелер. Биз, уллулар, оланы шо англавун apтдырывдагъы талапларын толу кюйде яшавгъа чыгъармайбыздыр.

Бизин къызларыбыз аслу гьалда кимге ошамагъа сюегенин де сорагъанман. Ачыкъ болгъаны йимик, оланы кёплери анасына, муаллимине, къурдашына, китапларда, кинофильмлерде ёлугъагъан игитлеге ошамагъа сюелер.

Кёбюсю гезиклерде къызлар герти ёлдашны, «акъ елкенлени», йыракъ сапарланы гьакъында ойлаша. Къызланы 9 проценти буса бир затны гьакъында да ойлашмай, бир тюрлю сама да умутлары болмай. Шо яхшымы? Яманмы? Ким нечик къарайгъанына гёре бола…

Къызланы хыйлыларыны оьзлени яшыртгъын сырлары бола. 30 процентини буса сырлары ёкъ ва болмагъан. Оланы барысыны да юрек сырларын чечеген къурдашлары бола. Кёплерини шо къудашлары алышынмай къала.

Къызлар яшавда сюювге кёп уллу агьамият берелер. Оланы 92 проценти уьйленмек учун инг башлап тарыкълы зат сююв деп ойлаша. Бир-бирлери буса, сюювден къайры, мадарлыкъ да болмагъа герек деп гьисап эте. Анкетде къызланы янгыз 1,6 проценти яшлары болгъанны сюймейбиз деп яза, 9 проценти бир яшы болма герек деп гьисап эте. Кёп яны буса эки, уьч ва дагъы да артыкъ яшлар болгъанны сюе.

Бары да къызлар оьзлени уланлар ушатгъанны сюе. Тек кёплерин «мени бирев де сюймей къойса нечик бола?» деген къоркъув къыйнай. Олар сюювде гечикмеге къоркъа. Шолай гезиклерде уллулагъа тынгласа, олар бир тюрлю кюйде айта, къурдаш къызлары буса жагьиллик гетгинче ондан пайдаланмагъа герек дей, улан да: «Гьалиги къайдада яшайгъан къыз бол!» – деп айта. Шолай гезиклерде олар бугюнню къызлары нечик болмагъа герек экен деп янгыдан ойлашмагъа башлай. Медицина къуллукъчуланы лекцияларына тынгласа, къыз ва улан бир-бири булан эрте ювукъ болмакълыкъ бек къоркъунчлу деп гьисап этелер. Сюювде тенглик болса да, табиат алышынмагъан кюйде къала: яшавда янгылышмакълыкъ уландан эсе къызъяшгъа юз керен артыкъ къыйын.

Къызланы кёплери: «Оьзюмню аяма, насибим учун оьзюм-оьзюмню сакълама, гьюрмет этме герекмендир?»–деп ойлаша. Гьалиги заманда яшавда адам гьар якъдан оьзюн гьыздан чыкъмагъа къоймай сакълап бажармаса пайда ёкъ.

Гьалиги заманны къызлары тюрлю-тюрлю бола. Олагъа да, бизге де тынч тюгюл. Тангалагъы гюнде олар бары да оьсюп эрлени къатынлары, яшланы аналары болажакъ. Къызларыбыз нечик къатынлар, аналар болажагъы бизден гьасил бола.

 

 

 

 

Онгаргъан

Гёгюрчюн АТАЕВА.

Авторизация
*
*
Регистрация
*
*
*
Согласны с условиями сайта?
Генерация пароля