Эмли къоллар

Чагъаротар юртдан чыкъгъан Батырсолтан Гьамзатов Хасавюрт больницаны яшлар бёлюгюню врачы болуп ишлейгенли кёп йыллар бола. Доктор касбугъа гьакъ юрекден берилген адам башлап юрт школада 7 класны тамамлай, сонг медучилищени студенти бола.

Загьмат ёлун Батырсолтан Моксоб юртдагъы участка больницада башлай. Билимин толумлашдырмакъ мурат булан Магьачкъаладагъы мединститутгъа тюшюп, яшлай тутгъан мурадына етише.

– Загьматгъа хирург гьисапда харш салгъан гюнюм 1980-нчи йыл эди, – дей Батырсолтан Гьажиакъаевич. – Шо йыл Москвада яйлыкъ Олимпиада оюнлар болду. Булай тарих агьвалат кимни эсинден таяжакъ?

– Мени насигьатчым Батырсолтан Гьажиакъаевич булан бирликде, татывлукъда ишлеме насип болду, – дей иш ёлдашы врач Гьажи Османов. – Булай бажарывлу, оьр даражада ишин юрютюп болагъан, алтын къоллу, сююнчюнге табылагъан адам яшавда сийрек ёлугъа, – дей ол, сёзюн тамамлай туруп.

Батырсолтан Гьамзатов Дагъыстан Республиканы ат  къазангъан врачы экенни айтсакъ да, кёп зат англашыла. Бёлюкню аркъа таяву болуп Батырсолтан Гьажиакъаевич булан янаша аврувланы рази­лигин къазанып гелген врач Мурат Къазахмаев, медсестралар Узупат Абдуллаева, Макка Хидирова, Рая Умарова, Зоя Гебекова – макътавгъа лайыкълы медицина къуллукъчулар.

Батырсолтанны насипли, татывлу агьлюсюнде уьч авлет тарбиялана. Яшавда кёп сюеген касбулагъа амин болуп, уьй-эшик къуруп, ата-анасыны сююнчюне сююнч къоша. Маржан – педагогика илмуланы кандидаты, Разият – экономист, Рамазан – юрист. 

Батырсолтан Гьажиакъаевич Гьамзатов гьар гюн эртен аврувлагъа етишме алгъасай, оланы савлугъун лап уллу савгъатгъа санай.

 

 

Зайналабит Басханов.

СУРАТДА: Батырсолтан Гьамзатов.

Авторизация
*
*
Регистрация
*
*
*
Согласны с условиями сайта?
Генерация пароля