Жыйында Дагъыстанны печатгъа ва маълуматгъа къарайгъан министри Азнавур Гьажиев, Дагъыстанны Халкъ Жыйыныны депутаты Биярслан Изиев ва Дагъыстанны Башчысыны темиркъазыкъ бойдагъы даимлик вакилини ёлбашчысыны орунбасары Элдар Дунакъаев ортакъчылыкъ этдилер. Залда районну юртларыны, къурумланы ва къуллукъланы ёлбашчылары, аманлыкъ сакълав къурумланы вакиллери, район жыйынны депутатлары, жамиятны ва яшёрюмлени вакиллери олтургъан эдилер.

     Жыйынны ача туруп, «Бабаюрт район» деген муниципал къурулувуну ёлбашчысы Дадай Даветеев Дагъыстанны Башчысыны Дагъыстанны Халкъ Жыйынына Чакъырывунда Дагъыстанны яшавуну бары да тармакъларыны масъалалары гётерилгенни, республиканы жамият-экономикасыны оьсюв ёлларына генглешген анализ берилгени ва республиканы алдында токътагъан аслу масъалалар белгиленгенни эсгерди.

         Дагъыстанны Башчысыны Дагъыстанны Халкъ Жыйынына Чакъырывуну аслу янларыны гьакъында Дагъыстанны печатгъа ва маълуматгъа къарайгъан министри Азнавур Гьажиев айрыча токътады. Ол оьзюню сёйлевюнде Чакъырывда респуб­ликаны алгъа барывуну ёллары гёрсетилгенни ва шонда ерли гьакимликлеге де айрыча тергев бакъдырылгъанны эсгерди.

         Азнавур Гьажиев оьзюню тергевюн айрыча юрт хозяйствогъа, ерлерде ашамлыкъ малланы чыгъарыв масъалалагъа бакъдырды. Ол оьзюню сёйлевюнде яшёрюмлени патриот ругьда тарбиялавну, дин масъалаланы, жамиятны аманлыгъын болдурувну, ерлерде налог жыйывну бир ёлгъа салмагъа тюшегенни гьакъында эсгерди.

              Сёз ёругъу етишгенде, жыйылгъанланы алдында Бабаюрт районну «Фронтовиклени яшлары» деген жамиятыны ёлбашчысы Вайдулла Шайыбов да чыгъып сёйледи. Ол оьзюню сёйлевюнде Дагъыс­танны Башчысыны Чакъырыву бугюнгю жамиятны бары да къатлавларына тиегенни эсгерди.

       «Бабаюртну янгылыкълары» деген район газетни редактору Абидат Абасова Рамазан Гьажимуратович оьзюню Чакъырывунда бу йылны сентябр айында Да­гъыстанда оьтгерилежек сайлавлагъа тергев бергенни эсгерди.

       Бабаюрт районда танывлу сабанчы, Хамаматюртдагъы «Юзюмчю» деген сабанчы-фермер хозяйствону ёлбашчысы Шагьав Зубайыров оьзюню сёйлевюнде бугюн Дагъыстанны алгъа барывуну аркъа таяву болуп токътагъан юрт хозяйство тармакъдагъы четим масъалаланы уьстюнде токътады.

         – Юрт хозяйство тармакъ гьаман да Дагъыстанны аслу тармагъы болуп гелген, – деди Ш.Зубайыров. – Дагъыстанны Башчысы Рамазан Абдулатипов да Да­гъыстанны алгъа барывун инг башлап шо тармакъ булан байлай. Ташлангъан юртларда оьзюню гелимли болгъан тармагъын гене янгыртмагъа, яшёрюмлеге иш ерлер ачмагъа, Дагъыстанны базарын къырдан гелеген ашамлыкъ маллар булан тюгюл, биз оьзюбюз болдургъан маллар булан толтурмагъа герек. Шогъар юртларда бары да имканлыкълар бар. Янгыз халкъны алдына да тюшюп, адамланы ишге къуршамагъа герек. Бизин халкъ ишден баш къачырмай. Олагъа ёл гёрсетеген адамлар герек.

         Биз ашлыкъ чачып да, гьайванчылыкъ тармакъда ишлеп де болабыз.

       Дагъыстанны Башчысыны Дагъыс­танны Халкъ Жыйынына Чакъырывун бабаюртлулар бир гёнгюлден якъладылар ва Рамазан Абдулатиповну савлай Дагъыс­танны жамиятын янгыртывгъа алгъан ёлун тюз гёрдюлер. Жыйынны ахырында буса Р. Абдулатиповну Чакъырывун гьар юртгъа, гьар районгъа етишдирмек учун ерлерде де жыйынлар оьтгермеге къарар къабул этилди.

Герейхан ГЬАЖИЕВ,

бизин мухбирибиз.

СУРАТДА: жыйынны ортакъчылары.

Автор чыгъаргъан сурат.