Артдагъы вакътилерде, Россияны къошмагъанда да, бизин Дагъыстанда нечакъы савлугъун беклешдиреген идаралар ачылып тура. Оланы кёбюсю гьатта тыш пачалыкъларда къолланагъан медицина алатлар булан да таъмин этилинген. Нелер айтсакъ да, кёп гезиклер врачлагъа къабунуп къарсаласакъ да, амма оланы арасында оьзге ерлерден къалышмайгъан кюйде атлары данггъа айтылгъанлары да аз тюгюл. Шону учун да медицина къуллукъчуланы гюнюнде олар оьзлени гьаракатыны натижаларындан оьктем болмагъа толу ихтияры бар.
Айтагъаныкъ, артдагъы вакътилерде, орта гьисапда алгъанда, Дагъыстанда оьлегенлени санаву 2,4 керенге кемиген.
Мисал учун эсгерсек, адамны къаныны ишлевюне байлавлу аврувлардан гечинегенлер 2, 9 керенге, яман аврувлардан – 2,8, югъагъан аврувдан – 3,5, кёкюрек аврувдан буса 3,3 керенге оьлегенлени санаву тёбен тюшген.
Ондан къайры да, Дагъыстанда тувагъанланы санаву да артгъан демеге ярай. Шону булан бирге, яш табагъанда гечинеген нарысталаны санаву да тёбенлешген. Республикада халкъгъа медицина якъдан кёмек этив яхшылашгъангъа гёре буса да ярай, адамланы оьмюр чагъы да артгъан. Шолай натижалар буса Дагъыстандагъы савлукъ сакълав тармакъда яхшы янына шайлы алмашынывлар болгъанлыкъ булан байлавлу.
Дагъыстанда къантамурлар булан байлавлу аврувланы сав этивню камиллешдиривге багъышлангъан программагъа гёре республика клиника больницадан къайры, Хасавюртда, Къызларда, Дербентде, Буйнакскиде къантамурлагъа къарайгъан центрлар ачылгъан. Энниден сонг да медицинада дагъы да тюрленивлер болажагъына бирдокъда шекленмейбиз.
Бизин мухбирибиз.
