Яшёрюмлер учун пайдалы болажакъ


Яшёрюмлени арасында наркоманияны ва ичкичиликни алдын алывда   спорт аслу ерни тута. Бугюн спорт янгыз залларда тюгюл, тезден къыргъа да чыкъгъан. Шагьарланы ва юртларыны орамларында спорт булан машгъул болмагъа сюегенлеге гёзге гёрмекли, къаркъарагъа пайдалы спорт майданлар арт-артындан ачылып тура. Озокъда, шондан сююнмей де болмайсан. Яшланы спортгъа къуршамакъ  жамиятыбызны алдынлы борчу болуп токътагъан.


Спорт артдагъы йылланы ичинде  Бабаюрт районда да генг кюйде яйылып тура. Районну юртларында спорт майданлар къурула, оланы айланасына жы­йылагъан яшланы санаву да йыл сайын арта. Артдагъы гюнлерде районну Люксембург юртунда да Россияда белгили «Спортмастер» деген тюкенни сиптечилиги булан спорт майдан ачылды ва шо агьвалат юртлулар учун да, район учун да уллу байрамгъа айланды.


Спорт майданны ачылывунда Дагъыстанны яшёрюмлерини ишлерине къарайгъан министри Арсен Гьажиев, ону орунбасары Магьаммат Маликов, «Поколение «Спортмастер» деген проект­ни ёлбашчысы Сергей Дроздов, низамсыз ябушувланы кочабы Рамазан Эмеев, «Вега-Групп» деген компанияны бёлюгюню ёлбашчысы Акылбек Эдилбеков, Бабаюрт районну ёлбашчысыны орунбасары Агьмат Юсупов, район администрацияны  яшёрюмлерини, маданиятны ва спортну ишлерине къарайгъан бёлюгюню ёлбашчысы Илмидин Абдуразакъов, районну имамы Асгьабали Мурзаев ва Люксембург юртну башы Мурат Къадыров  ортакъчылыкъ этдилер.


Шатлы агьвалатны ача туруп, Бабаюрт районну ёлбашчысыны орунбасары Агьмат Юсупов спорт майданны ачылывуна къол ялгъагъан Дагъыстанда яшёрюмлени ишлерине къарайгъан министри Арсен Гьажиевге ва «Поколение «Спортмастер» деген проектни ёлбашчысы Сергей Дроздовгъа районну башы Элдар Къарагишиевни атындан разилик билдирди, Сергей Дроздов буса энниден сонг Бабаюрт районну къонагъы болажакъны билдирди. Ери гелгенде эсгермеге  ярай, Сергей Дроздов оьзю де бабаюртлулар оьзюн къаршылагъан кюйге бек рази къалды.


– Мен уьлкебизни нечесе еринде де болгъанман, тек бугюнге ерли мени Бабаюртда йимик бир ерде де къаршыламагъан, – деди оьзюню сююнчюн яшырмай Сергей Дроздов. – Энниден сонг да биз яшланы спортгъа къуршамакъ учун чаралар гёрежекбиз.


Адатлы дагъыстан мердешлеге гёре Сергей Дроздовгъа Дагъыстанда яшёрюмлени ишлерине къарайгъан министри Арсен Гьажиев ямучу, бёрк ва хынжал савгъат этди, шону булан къонакъны Дагъыстан булангъы аралыгъын беклешдирди.


Оьзюню сёйлевюнде Арсен Гьажиев де «Спортмастер» деген тюкенни башын тутгъанлагъа Дагъыстанда спортну оьсювюне этип турагъан къошуму учун гьакъ юрекден баракалла билдирди.


– Бугюн люксембурглу яшлагъа савгъат этилген спорт майданны  багьасы 500 минг манатгъа тенг, – деди Арсен Гьажиев. – Амма оьсюп гелеген яш наслубузну тарбиялавну багьасыны къыйматы ёкъ. Оланы гьюнерин ва савлугъун артдырмакъ учун спорт майданда бары да имканлыкълар бар. Арадан заман гетип, бугюн мунда жы­йылгъан яшланы арасындан белгили спортчулар чыгъажакъгъа шеклик этмеймен.


Шо гюн низамсыз ябушувлардан уллу оьрлюклеге етишген Рамазан Эмеев де яшлагъа уьлгю болуп токътады. Ол юртлу яшлагъа насигьатлар бере туруп, Дагъыстандан кёп санавдагъы белгили спортчулар чыкъгъанны эсгерди.


–  Чинкдеси, бизге оьзюбюзню халкъыбызны тарихин унутмагъа ярамай. Сиз оьсме ва тюрленмеге герексиз. Биз гележекде де оьзюбюзню яныбыздан сизге болагъан кёмегибизни этежекбиз, – деди белгили кочап.


Озокъда, шолай майданлар районну гьар юртунда да болмагъа герек. Бугюн районну спорт тармагъы гьали болгъанча болмагъан оьрлюклеге чыкъгъан. Гьар юрт республикагъа чы нечик де, Россия ва дюнья оьлчевде алдынлы ерлеге ес болуп турагъан спортчулары булан оьктем бола. Юртларда спортну оьсювюне янгы имканлыкълар ярата туруп, ювукъ вакътиде районну  аты дагъы да гючлю айтылажакъгъа шеклик этмеймен.


Сёйлевлерден сонг жыйылгъанланы алдында Бабаюртдагъы «Тангчолпан» деген Россияны халкъларыны мердешли маданият центрыны къуллукъчулары концерт программасын гёрсетдилер. Спорт майданны ачылывуна багъышлангъан шатлыкълар сав гюнню боюнда узатылды.


 


Суратда: яшёрюмлер спорт майданда.


Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля