Яш кочап

   


Пятница, 30.03.2018г. — «ЁЛДАШ».



Белгили экени йимик, бугюнлерде ата юртундан йыракъда яшав къургъан къумукълар кёп. Биз оьзюню гьакъында айтмагъа сюеген спортну каратэ ва грек-рим ябушув жураларындан оьзюню чагъына гёре мекенли оьрлюклеге етишип гелеген Темирлан Абисаков. Ол Новосибирск шагьарда яшайгъан оьркъазанышлыланы агьлюсюнде тувгъан ва тарбиялана.


 


Ол Новосибирскиде бешинчи класда инг яхшы къыйматлар алып охуй, шону булан бирге оьзю кёп сююп танглагъан спортну журалары булан да машгъул болмагъа заман таба. Ябушув халчада эринмей-талмай оьзюню бажарывлугъун, гьаракатын да гёрсете. Оьрюм яшланы арасында ол Краснодар ва Алтай крайны да ябушувну каратэ ва грек-рим жураларындан алты керен чемпиону болгъаны да шону герти кюйде исбатлай.



Темирлан гиччи ватанындан кёп арекде яшайгъангъа гёре, тенглилери булан орусча сёйлемеге борчлу бола буса да, ана тилин билмей къоймагъа ярамайгъанын англамай тюгюл. Оьзюне: «Сен къайсы якълысан?» – деп сорагъангъа, оьктем кюйде: «Мен къазанышлыман»,– деп жавап къайтарагъаны да агьлюсюнде асил къылыкъ хасият битимине сингдирилип тарбияланагъанын гертилей.  



Бир де къопдурувсуз айтгъанда, Новосибирск шагьарны ич ишлер бёлюгюнде чалышагъан атасы Къасым ва сатыв-алыв тармакъда ишлейген анасы Сайида ону адилли ва намуслу улан этип, яшдан берли айтгъан сёзюн ерде ятмагъа къоймай, халкъ арада, эл арада алгъышлангъан намусгъа, ягьгъа, эдепге байланып яшамагъа уьйретегенине шагьатлыкъ эте.



Биз де Темирлан Абисаковгъа, оьзю къайда болса да, къумукъланы атын данггъа чыгъарар йимик къаст этип яшамакъны ёрайбыз. Гележекде ол спортда да оьзю умут этеген уьстюнлюклеге етишип, янгыз ата-анасын тюгюл, дос-къардашын да, юртлуларын да, халкъын да сююндюрежекге инанабыз.



Авторизация
*
*
Регистрация
*
*
*
Согласны с условиями сайта?
Генерация пароля