Россияны чемпионаты оьтгерилди

    Алдагъы гюнлерде тутушуп ябушувдан 1998 – 2000-нчи йылларда тувгъан яшланы арасында Россияны чемпионаты Хасавюртда Гьамит Гьамитовну атындагъы спорткъалада оьтгерилди. Уьч гюн юрюлген ярышларда Россияны сегиз регионундан гелип 450 яш кочап ортакъчылыкъ этди.


– Бу чагъындагъы яшланы арасында Россияны чемпионаты гьалиден он йыл алда да оьтгерилген эди. Айтагъаным, булай уллу ярышланы Хасавюртда оьтгерме къыйын тюгюл. Физкультурагъа ва спортгъа къарайгъан  министерлиги ва Хасавюрт шагьар администрация ярышлар къурумлу оьтсюн учун бек къаст этдилер.


Оьтген ярышланы ортакъчыларыны арасында дюньяны, Европаны ва Россияны чемпионлары болгъанын да эсгерме сюемен. Дагъыстанны кочаплары  20 медаль къазанма болдулар. Олар 6 биринчи, 5 экинчи ва 9 уьчюнчю ерлени къазандылар. Он тюрлю авурлукъда финал ёлугъувлар  бек къужурлу оьтдю. Шо ёлугъув­ларда дагъыстанлы кочаплар оьзлени яхшы яндан гёрсетме болдулар, – деди ярышланы баш судьясы Гьамзат Абасов.


Бабаюрт районну Адил Янгыюртундан къумукъ улан Динислам Тахтаров, 61 килода ерли хасавюртлу Рамазан Абдурагьимовну 14:2 санав булан утуп, чемпион болду.  Артдагъы уьч йылны ичинде Динислам уллу уьстюнлюклеге етип тура.


Ярышланы инг де яхшы кочабы деген савгъатгъа хасавюртлу Разанбек Жамалов ес болду.


– Финалгъа чыкъма тынч болмады. Кочапланы арасында Европаны чемпионатларында ортакъчылыкъ этгенлер де бар эди. Мен тутушуп ябушув булан машгъул болагъаным сегиз йыл бола. Темиркъазыкъ-Кавказ федерал округуну оьлчевюнде оьтгерилген ва Дагъыстанны чемпиону да болгъанман. Бу ярышлагъа мени Хасавюртдагъы «Спартак» деген хас олимпия спорт школаны тренерлери Арсен Бийболатов ва Залимхан Таваев гьазирледилер, – деди Россияны чемпиону Динислам Тахтаров. Къаягентли къумукъ улан Сайпулла Алиболатов 74 килода финал ёлугъувда Адыгеядан гелген  Агьмат Шокумовгъа утдуруп, гюмюш медальгъа ес болду.

 


Суратда: (ортада) Д.Тахтаров.


Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля