НАРИМАН СПОРТДАН АЙРЫЛМАЙ ЯШАЙ

      

Белгили болгъан кююнде, артдагъы йылларда Къаягент райондан чыкъгъан кочаплар гьар тюрлю оьлчевлерде оьтгерилеген спорт ярышларда лайыкълы уьстюнлюклени къазана ва оланы къурч гьаракаты-сынаву оьсюп гелеген нас­лулар учун лайыкълы уьлгю болуп токътай.



Шолай кочапланы бирисине, дагъы да ачыкълашдырып айтсам, Нариман Исрапиловгъа гьали-гьалилерде тутушуп ябушувдан Россияны ат къазангъан спорт устасы (ЗМС) деген гьюрметли ат берилген эди. Бугюнлерде буса ол эсгерилген райондагъы Къаягент юртда ачылгъан Олимпия ярышлар учун спортчулар гьазирлейген школаны (СДЮСШОР) директору этилип белгиленди.



Эсгерилген школагъа гьалиден 22 йыл алда баш тренер гьисапда Магьаммат Магьамматов белгиленген болгъан. Шо заман тутушуп ябушувдан кочапланы уьйретеген бёлюгюне биринчилерден болуп Нариман Исрапилов да геле. Шо гюн-бугюн арадан кёп заман оьтген. Оьтген вакътини ичинде Нариман бажарывлу тренерини усталыгъы ва оьз борчларына гьайлы янашыву булан тутушуп ябушувну сырларына теренден тюшюне. Шолайлыкъда, ол гьар тюрлю оьлчевлерде оьтгерилеген ярышланы ортакъчысы гьисапда оьзюню тутушуп ябушувгъа бакъгъан якъдагъы усталыгъын-гьюнерин ачыкъдан ташдыра. Дюнья, Европа ва шолай да оьзге тюрлю халкъара ярышларда лап да гёрмекли савгъатланы къазана. Ахырда Европаны чемпиону деген оьр атгъа ес бола.



Шолайлыкъда, Къаягент районда чемпиондан уьлгюленип, тутушуп ябушув булан яшёрюмлени кёплери машгъул болмагъа башлай. Демек, тутушуп ябушув оьсюп гелеген наслуну арасында гьалиги заманда районда спорт тармакъда оьзгелеринден эсе айрыча якълав табагъаны да англашыла.



Дагъы да ачыкълашдырып айтгъанда, бугюн ол башчылыкъ этеген ерли спорт школада тренери Магьаммат Хасбулатовични ва оьзге тренерлени гьаракаты булан тутушуп ябушувну сырларында кёп къадардагъы яшёрюмлер тюшюне. Шоланы сыдырасында буса бугюн Европаны чемпиону Ильяс Бекболатов да бар. Айтмагъа сюегеним, Къаягент районну спорт школасыны тутушуп ябушувдан кочапланы оьсдюрювде, Магьачкъала ва Хасавюрт шагьарлардан сонг, савлай республикабызны натижаларына гёре гьюрметли уьчюнчю ерде.



– Спорт школаны магъа инанып тапшургъаны саялы районну ва ДР-ни спорт министерлигине айрыча баракалламны билдирмеге сюемен, – дей Нариман Исрапилов. – Шо инамлыкъны ер этмей, янгы чемпионланы тарбиялав ишни оьзюме жаваплы ва сыйлы борч гьисапда къабул этемен. Демек, яш спортчуланы усталыгъын камиллешдирмек мурат булан бары да имканлыкъланы толу кюйде пайдаландырма къаст бар.



Гележекде сен ярышларда оьзюнг ортакъчылыкъ этме умутунг бармы деген соравгъа ол дагъы да бир йыл ябушма муштарлы экени гьакъда яшырмай айтды.



Авторизация
*
*
Регистрация
*
*
*
Согласны с условиями сайта?
Генерация пароля