Марат Магьамматов: «Ярышлар да оьтгериле, уьстюнлюклеге де етишиле»

   

 

 

«Спорт – савлукъну, сабурлукъну башы» деген бу сёзлер халкъыбызгъа, айрокъда яшларыбызгъа, жагьиллерибизге бек къыйышывлу.  Шону учун Къаягент районну ёлбашчылары спортну оьсювюне кёп агьамият  берелер. Райондагъы 37 охув ожакъда 125 касбучу, шоланы ичинде 66 тренер 3 мингден артыкъ яшлар булан чалыша, тарбиялай, спортну сырларына уьйрете. Къаягент районну физкультурагъа, спортгъа, туризмге къарайгъан  ва оьрюм яшлар  булан иш юрютеген  бёлюгюню заведующийи Марат Магьамматов булан бизин мухбирибиз тёбенде оланы гьаракаты гьакъда этген лакъырлашывну беребиз.


– Марат Агьматович, башлап сизин янгы къуллукъгъа белгиленгенигиз булан къутлайман. Алда сиз бёлюкню заведующийини заместители гьисапда уьч йыл чалышдыгъыз. Лакъырыбызны лап башында бёлюкню ишлерине къуршалгъанланы ва яшёрюмлени спортну гьар тюрлю жураларыны сырларына уьйренеген касбучуланы гьакъында охувчуларыбызгъа къысгъа маълумат бергенигизни сюер эдик.


– Спорт гьар адамны яшавунда белгили ер тута.  Яшлар, жагьиллер учун  спорт – аривлюкню кюрчюсю, савлукъ болдурагъан ёл, бары халкъгъа буса сабурлукъ, саламатлыкъ йимик асил хасиятланы да сингдире. Оьрде эсгерилген кюйде, райондагъы 37 охув ожакъда 125 касбучу, шоланы ичинде 66 тренер 3 мингден артыкъ охувчу яшланы тарбиялай, спортну сырларына уьйрете. Олар спортну 12 журасы булан машгъул. Ишлени юрютмек муратда къурулгъан бизин бёлюкде 7 адам чалыша. Олар барысы да – оьр билимли, ишин яхшы билеген сынавлу касбучулар.

– Спортчуланы материал-техника кюрчюсюню гьалы нечикдир?


– Яман тюгюл деп эсиме геле. Бугюн районда 68 спорт имараты бар. Шоланы 15-и – спортзаллар, 4-сю – спортну гьар тюрлю журалары булан машгъул болмакъ учун  токъташдырылгъан ерлер, 49-у – ачыкъ спорт майданчалар. Шоланы барысыны да умуми майданы буса 90852 квадрат метрге етише.

– Марат Агьматович, спорт секциялагъа къуршалгъанланы ишлери нечикдир? Уьстюнлюклери бармы?


– Гьар ишде йимик, спортда да янгыз материал кюрчюню  яратып къойгъан булан болмай. Ишлени барышы айрыча гьар адамны гьаракатындан гьасил бола. Ишин билеген, яхшы касбучулар тарыкъ. Районда артдагъы 15-20 йылны ичинде спортну айры-айры жураларында етишилген уьстюнлюклер оьрде айтгъан сёзлеримни бирдагъы гезик гертилей. Мисал учун, спортну олимпия жураларында яшёрюмлени гьазирлейген Къаягентдеги школаны уьстюнлюк­лери яхшы белгили. Спортну тутушуп ябушув журасында етишген уьстюнлюк­леге гёре Къаягентдеги спорт школа Магьачкъала, Хасавюрт шагьарлардан сонг уьчюнчю ерде ерлешген. Школаны уллу уьстюнлюклери биринчи гезик школаны тренери Магьаммат Хасболатович Магьамматовну чалышыву булан байлавлу. Шолай тренерлер районну юртларында дагъы да бар: Къаягентде З.Керимханов, И.Гьасанов, С.Арсланалиев, А.Арсланов, М.Жалилов, Янгывикъриде М.Магьамматов, Гьюсемегентде З.Керимханов, Янгыкъаягентде А.Шагьбанов.

– Сиз тутушуп ябушувда етишген уьстюнлюклени гьакъында айтды­гъыз. Спортну оьзге жураларында натижалар нечикдир?


– Умуми кюйде алгъанда, яман тюгюл. Мисал учун, ноябрни баш гюнлеринде Къазан шагьарда ябушувну гюнчыгъыш пачалыкълардагъы къайдаларындан оьтгерилген дюнья ярышларында гьюсемегентли Али Магьамматов чемпион деген атны бешинчи гезик къазанды. Шо – уллу уьстюнлюк. Алини биринчи тренери – Э.Къазанатов. Янгыкъаягентли А.Апаев де, башлыгентли Элбрус Элдерханов да – сынавлу тренерлер.


Енгил ва авур атлетикада, боксда да ишлерибиз яман тюгюл. Мунда Первомайск юртлу тренер Къурбан Къурбановну, янгыкъаягентли тренер Рустам Мустапаевни аслам пайы бар.

– Сиз кёбюсю гьалда спорт ожакъланы, оларда чалышагъан тренерлени ишлеринден къайры да, айры-айры спортчуланы натижалары гьакъда не айтмагъа боласыз?..


– 2017-нчи йылны май айында Словенияны Нови-сад деген шагьарында тутушуп ябушувдан Европаны чемпионаты оьтгерилди. Ярышларда ортакъчылыкъ этген къаягентли кочап Ильяс Бекболатов биринчи ерге ес болду. Ол дёрт керен халчагъа чыкъды ва оьзю булан тогъатартывлагъа бир бал алмагъа имканлыкъ сама да бермеди. Ноябр айда гьюсемегентли Али Магьамматов спортну ушу-саньда журасында дюньяны чемпиону болду. Октябр айда Шихсайит Жалилов Бугленде оьтгерилген бютюнроссия ярышларында биринчи ер къазанды.

– Марат Агьматович, яшёрюмлени уьстюнлюклери нечикдир?


Оьзлени эсли ёлдашларындан  олар даим уьлгю ала, олардан артда къалмагъа сюймейлер. Мисал учун, къаягентли кочап Сайпулла Алиболатов октябр айда Хасавюрт шагьарда оьтгерилген межконтинентальный кубокгъа, сонг Гьайдарбек Гьайдаровну савгъатларына ес болмакъ учун оьтгерилген турнирде де абурлу 3-нчю ерге, оьрюм яшланы арасында оьтгерилген Россияны чемпионатында 2-нчи ерге ес болмагъа бажарды. 86 кило авурлукъда тутушагъан яш кочап Абдулкъадыр Дадашев Юрий Гусовну эсделигине Владикавказ шагьарда оьтгерилген инг сынавлу кочаплар къуршалгъан турнирде 2-нчи канзиге гётерилди. Ярышдан-ярышгъа оьрлюклеге етишип гелеген булай яш кочапланы дагъы да кёплерини атларын айтмагъа боламан.

– Марат Агьматович, 2017-нчи йылда бёлюкню йыллыкъ планына гёре не йимик ярышлар оьтгерилген?


– Биз гьар йылны ахырында гелеген янгы йылда оьтгерилежек ярышланы йыллыкъ планын белгилейбиз ва шондан тайышмайгъан кюйде ярышлар оьтгеребиз. Шолай, 2017-нчи йылны планына гирген ярышлар барысы да оьтгерилди деп айтмагъа боламан. Мисал учун, Янгывикъриде ва Къаягентде футбол оюндан охувчу яшланы арасында Х.Р.Магьамматовну ва А.Б.Абдуразакъовну эсделигине байлавлу ярышлары оьтгерилди. Сонг да, орта школаланы командаларыны арасында волейболдан, енгил атлетикадан район ярышлары болду. Первомайское юртда авур атлетика булан машгъул болагъанлар кёп бар. Тренер Къурбан Къурбановну сиптеси булан бу юртда районну, республиканы спортчулары авур атлетикада ярышлагъа жыйылдылар. Шагьматланы да унутмайбыз. Тутушуп ябушувну, ябушувну гюнчыгъыш пачалыкълардагъы къайдаларындан оьтгерилеген ярышланы айтмай къояман. Шоларда 850 спортчу яш ортакъчылыкъ этдилер. Дейгеним, ярышлар да оьтгериле, уьстюнлюклеге де етишиле.


– Район администрацияны янындан  спортчулагъа къоллавгъа берилген спортзалланы, ачыкъ майданчаланы гьалын яхшылашдырмакъ, оланы дагъы да генглешдирмек, спортчулагъа яхшы шартлар яратмакъ муратда нечик иш юрюле?


– Оьрде биз юрютеген ишибизге байлавлу кёбюсю масъалаланы ачыкъ этсек де, сиз берген соравгъа жавап бермеге тынч тюгюл. Айтагъаным,  экономикадагъы четимликлер спортну оьсювюнде, спортчуланы ва олар булан чалышагъан муниципал къуллукъчуланы ишине де таъсир эте. Пачалыкъны ягъындан акъча маялар таман чакъы гёрсетилмейгени саялы, спортзалланы, майданланы ярашдырыв, яхшылашдырыв ишлер аста юрюй. Артдагъы йылларда шолай ишлер Башлы бойдагъы 5 юртну янгыз бирисинде, Къаягент бойда да янгыз бир юртда тюгюл оьтгерилмеген. Тек заман гете. Юртлулар да биригип, ойлашып, спорт имаратланы оьзлени ва кёмек къол узатагъан ягъада яшайгъан юртлуларыны гючюне таянып иш гёрелер. Тутушуп ябушувну савлай дюньягъа белгили усталары булангъы Къаягент юртда 2017-нчи йылда янгы спортзалны кюрчюлери салынды. Гелеген йыл ону къурулушун тамамламагъа къаст бар. Янгывикърилилер де шо къайданы къоллап, эки йыл алда ерли спортчулар учун тизив залны бинасын тикмеге бажаргъан. Бугюнлерде алхожагентлилер де оланы ёлун тутгъан.

– Сиз айтагъан кюйде, яшлар булан залларда, ачыкъ майданларда асувлу иш юрюле. Тренерлени  айлыкъ алапалары нечикдир?


–Макътардай тюгюл. Биринчилей, оланы иши тынч тюгюл экенин айтма тюше. Яшланы спортгъа машгъул этип къоймай, тренерлер оьзге муаллимлер йимик олагъа тарбия берив ишлени де юрютелер. Тек алапалары натижалары булан байлавлу. Уьстюнлюклеге етишгенлени алапалары уллу, ёкъланыки  тёбен даражада къала. Барысындан да янгы иш башлагъанлагъа авур. Оланы алапалары бек аз. Шону учун жагьил адамлар тренерни ишин юрютмеге рази тюгюл. Булай гьал бизин талчыкъдыра. Гележекге умут этип яшайбыз.

–2018-нчи йылда Къаягент районну спорт яшавунда нечик алмашынывлар къаравуллайсыз?


–Лап башлап гезик спортчуланы материал кюрчюсюн яхшылашдырмагъа, башлангъан спорт имаратланы къурулушун тамамламагъа ва ишге гийирмеге умут этебиз. Шондан къайры, районну башы Магьамматэмин Гьажиевни гьаракаты булан Каспий денгизни боюнда уллу спорт имаратны къурмагъа къастыбыз бар. Гьали ону федерал программагъа гийирмек муратда иш юрюле.  Спортчуларыбыздан да янгы 2018-нчи йылда дюнья, Европа, Россия ярышларында янгы уллу уьстюнлюклер къаравуллайбыз.

– Марат Агьматович, тарыкълы ишигизде 2018-нчи йылда да оьр натижалар ёрайбыз. Къаягент районлу спортчулар бизин дагъы да сююндюрежегине шеклик этмейбиз.


–Бизин ишибизге, гьаракатыбызгъа, районну спортчуларына этеген тергевюгюз саялы сизге де баракаллабызны айтабыз. Кёп савболугъуз!

Лакъырлашывну ягъан


М-Р. Ибрагьимов.


СУРАТЛАРДА: Марат МАГЬАММАТОВ; футбол оюндан район ярышларда биринчи ер алгъанлар.

Авторизация
*
*
Регистрация
*
*
*
Согласны с условиями сайта?
Генерация пароля