Европаны чемпионатыны алдында



   Арбагюн, февраль айны 14-нде, Дагъыстанны Башчысыны борчларын заманлыкъгъа кютеген Владимир Васильев Россияны ябушув спорт федерациясыны президенти Михаил Мамиашвили ва «Объединенный мир борьбы – Европа» деген халкъара федерациясыны вице-премьери Георгий Брюсов булан ёлукъгъан. Ёлугъувну барышында Каспийскиде апрель айны ахырында, май айны башында спортну ябушув журасындан оьтгерилежек Европаны чемпионатыны алдында эсгерилген шо агьамиятлы агьвалатгъа некъадар гьазирлик гёрюлюп турагъаны арагъа салынып ойлашылгъан.


Ачыкълашдырып айтгъанда, шо гюнлени алдында ва ярышлар оьтгерилегенде де бизин республикагъа къошум самолёт учувланы, олай да чемпионатны ортакъчыларыны ва къаравчуланы аманлыгъын болдурув булан байлавлу масъалаларына къаралгъан. Оьзге къурумчулукъ масъалаланы айланасында да пикру алышдырылгъан. 



Дагъыстанны Башчысыны борчларын заманлыкъгъа кютеген Владимир Васильевни сёзлерине гёре, бизин респуб­ликаны алдында бек четим, тек яшавгъа чыгъармаса ярамайгъан агьамиятлы  спортну ябушув журасындан Европаны чемпионатын къурумлу оьтгерив йимик жавап­лы борч салынгъан. Шолай даражадагъы ярышлар янгыз Дагъыстанда чы нечик де, савлай Темиркъазыкъ- Кавказ федерал округунда да гьалиге ерли бир керен де оьтгерилмеген. Али Алиев, Загалав Абдулбеков, Владимир Юмин, Бувайсар Сайтиев, Мавлет Батыров йимик кочаплар булан бизин республикада яшайгъанлар гьар заманда да оьктем болуп гелген. Алдагъы гюнлерде Ярыгинни атындагъы турнирде алдынлыкъ алып Красноярс­киден къайтгъан кочапланы  атлары уллу гьюрмет булан эсгерилди.



Ёлугъувну вакътисинде белгили болгъаны йимик, Европаны чемпионатына байлавлу гьазирлик ишлер алданокъ токъташдырылгъан ёрукъгъа гёре юрюле. Бугюнлеге ерли чемпионат юрюлежек спортну ва яшёрюмлерини А. Алиевни атындагъы къаласында кочап­лар ярышлагъа онгарылагъан зал генглешдирилген. Гелген сыйлы къонакълар, олай да къаравчулар олтурагъан, маълумат къуралланы вакиллерине гёрсетилген ерлени санавун артдырмакъ учун да мекенли чаралар гёрюлюп тура. Чемпионатны ортакъчылары, оланы тренерлери, судьялар ва журналистлер ерлешдирилежек къонакъюйлер белгиленген. Шону булан бирге, гьалиги шартлагъа жавап береген кюйде интернет байлавлукъну болдурагъан ясандырывлар къурашдырылып тура. Чемпионатны хас сайты ачылгъан. Шо сайтгъа ерлешдирилген материаллар булан иштагьланагъанлар орус, ингилис ва француз тиллерде таныш болмакъ учун шартлар болдурулгъан. Гелген къонакълар булан таржумачылар гьисапда ингилис, олай да француз тиллерде къатнамагъа болагъан ДГУ-да ва ДГПУ-да билим алагъан 450 студент танг­лангъан. Шондан къайры да, чемпионатны барышында ону ишине кёмекчилер гьисапда къуршалажакъ жагьил адамлар белгиленген. Оланы санаву 250-ге етише.



Оьз гезигинде Михаил Мамиашвили де чемпионатны къурумлу оьтгеривге къуршалгъан  касбучулар алдына салынгъан борчлагъа жаваплы янашмагъа тюшегени гьакъда айтгъан.



Шондан къайры да, ёлу­гъувда оьтгерилежек чемпионатгъа байлавлу артгъа салмай къаралмагъа тюшеген масъалаланы да тез арада чечивню ёллары белгиленген. 



Ёлугъувда ДР-ни Гьукуматыны Председатели Артём Здунов, ону биринчи заместители Анатолий Карибов, ДР-ни физкультурагъа ва спортгъа къарайгъан министрини борч­ларын заманлыкъгъа кютеген Магьаммат Магьамматов, Дагъыстанны тутушуп ябушувдан жыйым командасыны баш тренери Сажит Сажитов ортакъчылыкъ этген.



Авторизация
*
*
Регистрация
*
*
*
Согласны с условиями сайта?
Генерация пароля