Алдагъы гюнлерде, ачыкълашдырып айтгъанда, февраль айны 10-11-нде, Назрань шагьарда Россияда биринчиликни алмакъ учунгъу ябушувну грек-рим журасындан юрюлеген ярышларда халимбекавуллу Даниял Агъаев алтын медаль къазангъан.
Буйнакск районну администрациясыны прес-къуллугъу билдирегени йимик, Россияны Игити Алихан Калиматовну эсделигине багъышлангъан шо ярышларда 2001-2002-нчи йылларда тувгъан 400-ден де артыкъ кочап ортакъчылыкъ этген. Ярышланы алдынлылары ювукъда Аргентинада юрюлежек яшёрюмлени олимпиадасында, олай да дюньяда ва Европада биринчиликни алмакъ учун юрюлежек ярышларда ортакъчылыкъ этегенге гёре,эсгерилген ярышланы барышындагъы бары да тогъатартывлар къыставуллу кюйде юрюлген. Бизин республиканы атындан шо ярышларда ортакъчылыкъ этген 12 кочапны арасында янгыз Даниял Агъаев 42 кило авурлукъда алдынлы ерге ес болмагъа бажаргъан.
Шондан алда оьзге ярышларда да биринчи ерлеге ес болуп гелеген яш кочапгъа биз де гележекде ябушув халчада янгыз уьстюнлюклер ёрайбыз.
