Алдынлыкъ алып къайтгъан


Спортну окъ-жая атыв журасындан къурулгъан бизин республиканы жыйым командасы Железноводск шагьарда оьтгерилген ачыкъ турнирде ортакъчылыкъ этип къайтгъан. Окъ-жая атагъанланы «Чилле ёл» деген республика федерациясыны ёлбашчысы Жамболат Магьтибеков бизге билдиргени йимик, бизин спортчулар оьтгерилген ярышларда оьзлени оьр даражадагъы бажарывлугъун гёрсетген ва мекенли уьстюнлюклеге етишген.



Ачыкълашдырып айтгъанда, бизин республиканы жыйым командасына къуршалгъанлар шо ярышларда 6 алтын, 4 гюмюш ва 1 бронза медаль къазангъан. Бизин командада оьмюр чагъына гёре лап да эсли 60 йыллыкъ Абдулла Гьасанов, олай да Магьаммат Омаров, Магьамматкъасум Иманалиев, Гьарун Сайитов шо ярышларда алтын медаллагъа лайыкълы болгъан.



Шону булан бирге, Магьамматкъасум Иманалиев ва Гьарун Сайитов Ставрополь крайда иш гёреген окъ-жая атагъанланы центрларыны сиптечилиги булан юрюлген шо ярышланы оьлчевюндеги хас тогъатартывларда да алдынлыкъны алгъан.



Ярышланы барышында гюмюш медаллар къазангъан Шамил Набиев, Садрутдин Сиражутдинов, Сагьратулла Магьамматов, Магьамматарип Мирзаев ва бронза медаль алгъан Рашит Гьажиев де гёрмекли оьрлюклеге етишген деп айтмагъа ярай.



Окъ-жая атагъанланы бизин республиканы жыйым командасына гиреген спортчулар янгыз уьлкеде тюгюл, ондан тышда оьтгерилеген ярышларда да ортакъчылыкъ этип гелегенин шу ерде айрыча эсгермекни тийишли гёребиз. Шолай, олар октябр айда Беларусь Республиканы Гродно шагьарына барып, турнирде ортакъчылыгъын болдурмакъ учун бугюнлерде гьазирлик гёрюп тура.


Авторизация
*
*
Регистрация
*
*
*
Согласны с условиями сайта?
Генерация пароля