Яш муаллимни уьстюнлюклери


Юреги ушатагъан, пагьмусуна гёре сайлангъан загьмат – инсанны насипли этеген берекетли яшав ёлу. Шолай пагьмусуна гёре сайлангъан, къастлы загьматда яхшы гьасиллеге етишген Борагъан орта школада физкультурадан дарслар юрютеген муаллими Амир Артурович Хункермурзаевни гьакъында тюпде сёз юрюле.



А.Хункермурзаев Борагъан юртда тувгъан, ондагъы орта школаны 1-нчи класына юрюп башлагъан.



– Гьар къайсы гьаракат да, иш де, ёл да башында тюзелсе яхшы дей. Сени охувунг нечик башланды? – деймен.



– Бизин башлапгъы муаллимибиз Умукурсин Мавладиновна Жантаева эди. Биз, охувчулар, ону абурлай эдик. Ол дарсланы яхшы англата­гъандан къайры, охувчуланы жавапларын тюз къыйматлай эди. Сонг да, дарсны англамагъан охувчуланы дарслардан сонг къалдырып да дарсны англатмай йибермей эди. «Охувчу дарсын школада англап гетмеге герек», – дей эди ол, – дей Амир Артурович.



– Тюз айтгъан. Муаллимге тюзелген болгъансыз. Охувунг нечик болду?



– Бары да предметлерден оьр къыйматлар алсам да, гьисапгъа артыкъ ава эдим, – дей Амир Артурович.



– 2004-нчю йыл агьлюбюз Белоруссиягъа гёчюп, охувумну Могилёв областны Бобруйск шагьарыны 11 номерли орта школасында узатмагъа тюшдю. 2007-нчи йыл ону 9-нчу класын яхшы къыйматлагъа да битип, ондагъы 2 йыллыкъ Олимпия резервни училищесине тющдюм, – дей Амир Артурович.



Училищеде ол спортну грек-рим ябушув къайдасыны секциясына уллу иштагь булан юрюй.



– Гьар гюн 5 дарс ва ябушувдан 2 тренировка бола эди. Тез-тез училищеде, сонг да шагьарда, гьатта областда ябушувдан ярышлар оьтгериле эди. Шо ярышларда Амир актив кюйде ортакъчылыкъ эте ва яхшы уьстюнлюклеге де ете: училищеде Амир грек ва рим ябушувда 73 кило авурлукъда ва авур атлетиканы устасына кандидат нормаларын толтура. 2012-нчи йыл Амир Артурович училищени оьр къыйматлагъа да битип, биологиядан, орус тилден, юзювден, физкультураны теориясындан уьстюнлю кюйде экзаменлер де берип, Могилёв шагьардагъы А.Куляшовну атындагъы университетни физкультура дарсланы юрютеген муаллимлени гьазирлейген бёлюгюне охума тюше. 2016-нчы йыл, ону да уьстюнлю кюйде битип, ата юрту Борагъангъа къайта. Шо йыл Борагъан орта школада физкультурадан муаллим этилип белгилене.



– Школаны коллективи сени нечик къаршылады? – деген соравгъа ол:



– Школаны директорундан, за­вучларындан башлап, муаллимлер ва охувчулар тергевлю къаршыладылар: физкультурадан дарс береген яхшы сынаву бар муаллимлер С.Ташаев, Ш.Мамаев дарсларыма гелип де, оьзлени дарсларына чакъырып да, физкультурадан дарслар береген муаллимлени методика бирлешивюне къабул этип, ачыкъ дарслагъа чакъырып да, кёмек этип де, ачыкъ дарслар бердирип де, ра­йон семинарлагъа йиберип, менде яхшы кюйде оьз гючюме инамлыкъ тувдурдулар. Охувчуларым район ярышларда енгил атлетикадан биринчи ерлеге чыгъагъан болдулар, гьатта республикада да алдынлы ерлеге чы­гъып иштагьландылар.



2017-нчи йылны октябр айында Борагъан школада районну физкультурадан дарслар береген муаллимлери учун семинар оьтгерилген эди. Шо семинарда физкультурадан ачыкъ дарс берип, мен де ортакъчылыкъ этген эдим. Семинаргъа гелген муаллимлер дарсыма кёп арив багьа бердилер, – дей Амир Артурович, уяла туруп.



– Школагъызда физкультура дарсланы уьстюнлю кюйде оьтгерме шартлар бармы? – деген мени соравума ол:



– Школаны эки де корпусунда спортзаллар, школаны абзарында юртну спорт центры бар. Шо саялы болма ярай, охувчуларыбыз спортгъа абурлу янаша, гьатта спортчуларыбызны республикада да яхшы сыйы бар, – дей А.Хункермурзаев.



– Кёбюсю гезиклер физкультурадан дарслар береген муаллимлеге клас ёлбашчылыкъ берилмей къалагъан гезиклер бола. Сенде бармы клас ёлбашчылыкъ? Бар буса, къысгъаракъ тарбиялав ишни гьакъында айтгъанны сюемен, – дедим.



– Мен 8 «б» класны ёлбашчысыман. Тарбиялав иш плангъа гёре юрюле. Гьар гюн де сменаны алдында охувчуланы школагъа геливю тергеле. Билим алыв ва тарбиялав школагъа гелив булан байлавлу. Охувчуларымны школагъа геливю яхшы. Оланы кёбюсю чебер ва предмет кружокларда, спорт секцияларда ортакъчылыкъ этелер. Орус тилден, гьисапдан, историядан школа, сонг да, район олимпиадаларда 1-нчи ва алдынлы ерлеге ес болалар. Мен ёлбашчылыкъ этеген клас школада оьтгерилеген предмет жумалыкъларда, савлай школа оьтгереген дарслардан сонг юрюлеген гьаракатларда жагьлы кюйде ортакъчылыкъ эте. Муна бугюнлерде школаны алдындагъы уллу майданда юрюлген ярмакюде мени класымдагъы охувчулар оьзлер оьс­дюрген гьайваны, гьармутну, юзюмню, къызъяшлар биширген тортланы, чудуланы, пирогланы сатып, шайлы акъча къазандылар. Шо акъчагъа Сююнчкъалагъа экскурсиягъа бармагъа план къуралар. Шолайлыкъда, охувчуларыбызны базар экономикагъа уьйретебиз, – дей Амир.



– Охувчуланы ата-анасы булангъы аралыгъыгъыз яхшыгъа ошай, ярмакюде адам кёп эди, – деймен.



– Биз жыйынларда оланы авлетлерин сёкмейбиз, яхшы ишлери, уьстюнлюклери булан таныш этебиз, айрокъда яхшы охувчуланы ата-анасын макътайбыз, оланы тарбиялав сынавуну айланасында сёз юрюле. Осал охувчуланы гьакъында гьар ата-ана булан айрыча иш юрюле. Сонг да, Аналаны гюнюн, 8 мартны охувчулар булан бирге, къастлы гьазирлик де гёрюп, атларын айтып яхшы ата-аналагъа баракаллалар билдирип, охувчуланы къоллары булан этилген савгъатланы тапшуруп, гьар не кюйде де оланы гёнгюн алабыз. Класымдагъы охувчулар, бары да дегенлей, школа китапхананы охувчулары. Тюзю, китапханада къумукъ язывчуланы китаплары аз. «Ёлдаш» газетни аламан, ону «Яшланы дюньясы», «Ажайып дюнья» деген сагьифаларындагъы материалларыны уьстюнде охувчулар булан бирге ишлейбиз. Газетде чыгъагъан спортгъа багъышлангъан материалларын да охуйман, – дей Амир Артурович.



А.Хункермурзаев оьзю ишлеген аз заманны ичинде школаны, юртну, районну администрацияларыны баракаллалары, гьюрметли грамоталары булан савгъатлангъан. Ингдеси, муаллим коллективни, охувчуланы, оланы ата-аналарыны разилигин къазангъан. Биз де яш муаллимге гьакъ юрекден савлукъ, агьлюде насип, ишинде яратывчу уьстюнлюклер ёрайбыз.



Авторизация
*
*
Регистрация
*
*
*
Согласны с условиями сайта?
Генерация пароля