Кочапланы уьстюнлюгю


Яшайгъанланы гьисабын алгъанда, Эрменистанны уьчюнчю шагьары – Ванадзорда сентябр айны 8–10-нда тутушуп ябушувдан белгили совет, эрменили кочап, Сеулда болгъан Олимпия оюнларда гюмюш медальгъа ес болгъан. Европаны чемпиону, дюнья кубогун уьч керен къазангъан Степан Саркисянны савгъатларына халкъара ярышлары оьтгерилген. Шоларда Къаягентде яшланы спорт школасыны кочаплары да ортакъчылыкъ этген ва барысы да медаллар булан къайтгъан. Кочапланы бириси Сайпулла Алиболатов булан бизин хас мухбирибиз М.А.Ибрагьимов ёлукъгъан.



Шат хабар тез яйыла. Яш кочап Сайпулла Алиболатов халкъара турнирде биринчи ер къазанып, алтын медальгъа ес болгъан деген хабар бизин шайлы къувандырды. Уьйге къайтгъандокъ, биз ону булан гёрюшмеге токъташдыкъ.



Къаягент юртдагъы тутушуп ябушув школасы бугюн Магьачкъала, Хасавюрт шагьарлардан сонг Дагъыстанда уьчюнчю школа гьисаплана. Ванадзордагъы 23-нчю халкъара ярышлагъа Россияны ат къазангъан тренери Магьаммат Хасбулатовични сиптечилиги булан школадан дёрт кочап гетген болгъан. Эки гюн юрюлген ярышланы натижасында къаягентлилер 2 биринчи, бир экинчи ва бир уьчюнчю ерлеге ес болгъан. Биринчи ерлени етмиш кило авурлукъда тутушагъан къаягентли кочап Сайпулла Алиболатов, Уьзбекис­танны жыйым командасына гирген яш кочап Иса Шапиев алгъанлар. Экинчи ва уьчюнчю ерлени буса агъа-инилер Агьмат ва Гьамит Жалиловлар къазангъан.



– Эрменистанны лап уллу шагьарларыны бириси Ванадзор – бек арив шагьар. Мунда адамлар ял алмагъа, савлугъун беклешдирмеге гелелер, – дей Сайпулла. – Шагьар бизин исси гьава булан къаршылады. Халкъы да бек тизив, къонакъланы сюе, сый-гьюрмет этип биле.


– Ванадзордагъы ярышлар сизин учун уьстюнлю болгъан. Шо гьакъда айрыча не айтмагъа боласан?



– Ярышларда мен етмиш кило авурлукъда ябушдум. Эки гюнню ичинде дёрт ябушув болду. Биринчи гюн 3 керен халчагъа чыкъдым. Башлап эрменили кочап Давит Алоянны 12:0 санав булан утдум. Сонг магъа къаршы гюржюлю кочап Р.Малакоев чыкъды. 5:1 санав болгъанда, мен ону аркъасын халчагъа тийдирмеге болдум. Уьчюнчю тутушувум да гюржюлю кочап Мирза Схулухиа булан болду. Санавлар мени пайдама –15:5. Биринчи гюнюбюз шулай тамамланды.


– Сагъа финалда къаршы чыкъгъан кочап Эрменистанны бугюнге лап айтылгъан кочабы дюньяны ва Европаны 2013-нчю йылдагъы чемпиону Давит Сафарян болгъан. То­гъатартыв нечик юрюлдю?



– Давит Сафарян – гючлю кочап. Шону алынгъан баллар яхшы исбатлай. Мен биринчи минутлардан башлап алгъа юрюдюм. Шо магъа 1 бал гелтирди. Шолай тутушувну къаравулламагъан Сафарян терен ойлагъа тюшдю, бираз тартынды. Сонг мен дагъы да 2 бал алып санавну 3:0 этдим. Тутушувну 2-нчи яртысында ол 2 бал алмагъа бажарды. Тек халкъны гючлю харс урувларыны, кёмегини пайдасы Сафарянгъа ярашмады. Ябушув 3:2 санав булан мени пайдама битди.


– Сайпулла къалгъан яшланы ябушувлары гьакъда да айтмагъа ярай…



– Уьч де кочабыбыз да бек арив тутушдулар. Иса Шапиев (етмиш тогъуз кило) ва Гьамит Жалилов (етмиш дёрт кило) бугюн Уьзбекистанны ва Тажикистанны жыйым командаларына гире. Иса 3 керен халчагъа чыкъды. Ол оланы уьчюсюн де оьзюню пайдасына битдирди ва мени йимик 1-нчи ерге ес болду. Ону европа ярышларында уьстюнлюк алгъан Григор Григорян булангъы ябушуву айрокъда къужурлу оьтдю.



Етмиш дёрт кило авурлукъда тутушгъан Гьамит Жалилов экевюн утду, тек 3-нчю ёлугъувун утдуруп, 3-нчю ерге тюгюл чыкъмагъа бажармады. Ону агъасы Агьмат 
Жалилов (65 кило) да финалда россиялы кочап Артур Бадтиевге утдуруп, 2-нчи ерни къазанды.


– Сайпулла, къутлайман! Бу йыл дагъы нечик ярышларда ортакъчылыкъ этмеге къас­тынг бар?



– Кёп савболугъуз! Сиз мени унутмайсыз, даим тергев бересиз. Гьар ярышлардан сонг ёлугъуп, иш-гьалны билип, мени янымны тутагъанлагъа етишдиресиз. Ювукъ арада, тренерим Магьаммат Хасболатович булан ойлашып, Хасавюртда оьтгерилежек Б.Умахановну эсделигине багъышлангъан халкъара турнирде ортакъчылыкъ этмеге къастым бар. Ярышланы утмагъа бажарсам, тутушув ябушувдан «халкъара уста» деген атгъа ес болажакъман. Сонг да, уьстюнлюк магъа лап айтылгъан И.Ярыгинни турниринде ортакъчылыкъ этмеге ёл бере.


– Сайпулла, сагъа, тренерлеринге, кочап къурдашларынга янгы уьстюнлюклер ёрайман!



– Савболугъуз! Сизин булангъы ёлугъувдан пайдаланып, ювукъларыма, къурдашларыма, магъа даим кёмек этеген, гюч, ругь береген атам-анама, дос-къардашларыма, тренерлериме гьакъ юрекден разилигимни билдиремен.



Авторизация
*
*
Регистрация
*
*
*
Согласны с условиями сайта?
Генерация пароля