Алдагъы гюнлерде «Анжи-Аренада» футбол оюн булан иштагьлана—гъанлар кёпден гёзлеген агьвалат болду. Ачыкълашдырып айтгъанда, оьтгерилген прес-конференцияны барышында «Динамо-Магьачкъала» деген футбол клубну президенти Гьажи Гьажиев бизин республиканы маълумат къуралларыны вакиллерине баянлыкъ берди.
Ол инг алда Россияны футбол союзуну ёлбашчысыны янында иш гёреген эксперт-суд комиссиясына къуршалгъанлар «Пари НН» команда булан оьтгерилген оюнгъа байлавлу къабул этген къарарына разисизлигин билдирди. Шону булан бирге, мухбирлени соравларына жаваплар бере туруп, оьзю ёлбашчылыкъ этеген футбол клубу ювукъ вакътини ичинде не йимик ишлени яшавгъа чыгъармагъа гёз алгъа тутгъанын малим этди.
Ону сёзлерине гёре, футбол ойнайгъан командалар булан бирче майданчагъа чыгъып, оланы гьаракатын къыйматлайгъан гьар арбитр ФИФА, олай да УЕФА токъташдыргъан ва тасдыкъ этген гесимлеге асасланып иш гёрмеге тюше. «Пари НН» ва «Динамо-Магьачкъала» оьтгерген оюнну барышында арбитрны бизин командагъа бакъгъан якъдагъы янашыву савлай россиялы футболну сансымай иш гёргенлиги болуп токътай. Неге тюгюл де, арбитр шо оюнну вакътисинде бизин командагъа къуршалгъанланы къыйыкъсытмагъа къасткъылып тургъанын касбучулардан къайры да, футбол оюн булан машгъул болагъан гьар ким де гьис этмей къоймады. Гьар арбитр футбол майданчада оьзтёрече иш гёрегенлиги башалманчылыкъгъа ёл берегенин ташдырды.
Шондан сонг, Гьажи Гьажиев «Динамо Магьачкъала» футбол клубну тренерлери гележекде не къадар иш гёрежегин ачыкъ этип сёйледи. Гьар оюнгъа къуршалагъанланы баш тренер токъташдырагъанын эсгере туруп, ол, артдагъы вакътиде къошулгъан Табидзе, Ангбан ва Мрезиг, умуми кюйде алгъанда, савлай команданы оюнун къолайлашдырывгъа болушлукъ этежегине инанагъанын билдирди. Кирш, Котинге ва Ян Джапогъа ювукъ вакътини ичинде «Динамо-Магьачкъала» ойнайгъан къайдасына тюшюнмеге тарыкъ. Словениядан гелген Ян Джапону гьакъында айрыча айтгъанда, ол янгыз бизин команда тюгюл, савлай премьер-лиганы гьисапгъа алгъанда, гележекде майданчада лап чалт айланагъан оюнчу болажакъгъа умут бар. Глушков, Юсупов, Ангбан ва Крачковский майданчада бирче иш гёрегенде, гьаракаты натижалы болар йимик чалышмагъа бола.
Насрулла БАЙБОЛАТОВ
