Уьстюнлюкге аслам къошум этгенлер

      Ватаныбызгъа фашист елевчюлер хапарсыздан чапгъын этгенде, совет элибизни халкъы булан бирге Бабаюрт районну халкъы да Ватанын якълавгъа гётериле. Кёп санавдагъы уллулар ва жагьиллер давгъа гете. Элибизге от-оьртен яя гелеген намарт душмангъа къаршы юрюлеген оьжетли ябушувлагъа уллу-гиччи, къарт-яш, къатын-къыз оьз къошумун этме чалыша.

         Уланларын, эренлерин, эркъардашларын давгъа узатгъан ата-аналар, жагьил тиштайпалар, къызардашлар, оланы ерин тутуп, ашамлыкъ маллар, оьзге тюрлю тарыкъ-герек булан фронтдагъыланы таъмин этмек учун гечесин-гюнюн бир этип дегенлей, къайратлы загьмат тёкген.

       Давну шо къагьрулу, авур йылларында тылда ишинден бир гюн де къалмай загьмат тёкген ватандашлар да кёп къы­йынлыкъланы башдан гечирген. Мен оьзюню гьакъында язмагъа сюеген Халжат Жанбекова да – давну алдындагъы йылларда ата-анасын тас этген, билим алмагъа кюю болмагъан, шо къыйынлы йылланы агъусун ютгъан, къыйынлыкъланы, ачлыкъны гёрген.

         Халжат Жанбекова 1924-нчю йылда Бабаюрт районну Ахайотар юртунда тувгъан. Ону атасы районда белгили доктор болгъан. Амма ол ата-анасын яшлайын тас эте. Ата-анасы оьлген сонг, бир ожакъда тарбиялангъан яшлагъа къысмат буюруп, бир-биринден айырылма тюше. Халжатны дос-къардашы сакълай, ону эркъардашлары етим яшланы сакълайгъан уьйге бакъдырыла. Дав башлангъан вакътиде Халжатны уллу эркъардашы Абдулмажитге 17 йыл тамамлана. Оьзюню чагъындагъы яшлар булан бирге ол гёнгюллю кюйде давгъа гете.

       Юрт яшав да уллу тарчыкълыкълагъа тарый. Къышны сувугъуна, язны яллавуна къарамай, 11–14 йыллыкъ яшлар да къартлар булан бирге авлакъ ва оьзге тюрлю ишлерде ортакъчылыкъ этелер. Шо къагьрулу йылларда Халжат Жанбекова да оьзюню тенглилери булан колхозда ишлей, уьстюнлюкню ювукълашдырмагъа оьз къошумун эте.

         – Биз гёрген къыйынлыкъланы бирев де гёрмесин, – деп хабарлай, шо къагьрулу йылланы эсгере туруп, тылда загьмат тёкген Халжат Жанбекова. – Мен 11 йыллыкъ чагъымда авлакъда, этегиме мамукъ жыйып, окоплар, татавуллар къазып ишлей эдим. Авур ишлер бизин къатдырды. Арыгъанлыкъдан татавулланы къазагъанда ягъагъа ташлайгъан топуракъ къайта бизин уьстюбюзге тюше эди. Арекге ташламагъа гючюбюз етишмей эди. Нечик буса да, биз арыгъаныбызны, ачлыкъны гьис этсек де, чыдай эдик. Уьс­тюнлюкню гюнюн ювукълашдырмакъ учун биз, тылдагъылар да, къасткъылып чалышгъанбыз.

        «Уьстюнлюк…», «Дав битген» деген сёзлер 1945-нчи йылны 9-нчу майда уллу совет уьлкени гьар гиччи авулуна да уллу сююнч булан чалынды. Дав битген… Фашист Германия дагъылгъан… Шо гюн узакъ 4 йылны боюнда тылда ял алмай чалышгъанлар учун да биринчилей болуп яллыкъ бериле. Айланада шат макъамлар чалына, сююнч уллу тойгъа айлана…

      Уллу Ватан дав битген сонг, Халжат Жанбекова Люксембург, Туршунай юртларда авлакъда, фермаларда савунчу болуп да ишлей, оьзге ишлеге де къуршала.

          Ону эркъардашы Абдулмажит де давдан эсен-аман уьюне къайта, оьзюню черин табып уьйлене. Ол узакъ йыллар бир-биринден айырылып тургъан къызардашын ва инилерин янына алып, бир агьлю болуп яшайлар.

        Пачалыкъ оьзюню къоччакъ уланларын ва къызларын унутмай. Тылда гёрсетген къайратлы загьматы ва давдан сонггъу йылларда уьлкени бузулгъан-тозулгъан экономикасын аякъгъа тургъузувда етишген уьстюнлюклери саялы ол бир нече медаллагъа, гьюрметлев грамоталагъа ес болгъан. Гьар йыл Уллу Уьстюнлюкню байрамы булан къутлап, Халжат Жанбековагъа Россияны Президенти Владимир Путинни атындан къутлав кагъыз геле. Ол шо кагъызланы кёп аявлап сакълай.

        – Бизин гьайыбызны этип, бизин гёнгюбюзню алагъаны саялы бизин Президентибизге разилигимни билдирмеге сюемен, – дей Халжат Жанбекова.

         Биз буса Халжат Жанбековагъа яшавда яхшы савлукъ, насип, парахатлыкъ ёрайбыз. Оьсюп гелеген яш наслугъа даим уьлгю болуп, оланы патриот ругьда тарбиялавда этген къошумугъуз саялы кёп савболугъуз деп де айтмагъа сюебиз.



А.Хамавова.

Бабаюрт.

Суратда: Халжат Жанбекова.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля