Миллетчилер къутургъан

Бир-биревлер: «О гьакъылгъа мукъ адам этген ча­къырывланы, сёзлени гьисапгъа алма тарыкъ тюгюл. Ол нени де сёйлеп къоя», – деп, Жириновскийни айыпдан чайма къарайлар. Амма телевидениеден болагъан бары да къувунлу берилишлерде Жириновский бола. Сан этмейген адамны, сав дюнья къарайгъан, тынглайгъан берилишлеге неге чакъыралар?

Яшав сынав гёрсетеген кюйде, Жириновскийни так­лифлери аста-аста яшавгъа чыгъа барагъаны гёрюне. Телевидениени кёп программаларында чакъны гьалы берилегенде Темиркъазыкъ Кавказ республикаланы шагьарлары ёкъ болуп къала.

Гьали миллетчилик спортгъа да яйылып бара. Самара шагьарда «Анжини» къара бетли футболистин мысгъыллап, огъар банан атгъаны эсигизде. Муна Краснодарда артдагъы оюнланы биринде де «Кубань» команда булан «Анжи» ойнайгъанда хулиганлар Дагъыстанны байрагъын яллатгъанны футбол къаравчулар барысы да телевидениеден гёрдюлер. Республиканы сыйлы белгисин хорламакъдан ачув тиеген гьеч зат болармы? Маълумат къураллардан билдирилген кюйде, шо ишни этгенлер тутулгъан. Олар не даражада такъсырлангъан деп эсигизге геле? Республиканы байрагъын хорла­гъанлагъа 1 минг манат къоду салынгъан. Айтылагъан кюйде, олар оьзлер этген ишге гьёкюнгенлер ва гьакъ юрекден гечмекни тилегенлер. Кюлкю! Жинаят ишни этгенлер шу даражада такъсырланып турса, бузукълукълар, озокъда, токъталмас. Москваны «Лужники» деген стадионуну савлай бир яны башгъа миллетлени хорлап къычырагъанда, стадионну есилерине 10 минг манат къоду салына. Бу ишде стадионну есилери не гюнагьлыдыр?

Ярославль шагьарда «Спартак» ерли клуб «Шинник» булан футбол ойнайгъанда «Спартакны» якъчылары ерлешген трибунадан бирев фашист байракъны гётерип турду. Муна шолай чаралар къатты кюйде такъсырланмайгъангъа, дагъы гезик дагъы да бетери болажакъ.

Телевидение билдирген кюйде, «Спартак» команданы якъчылары шо футбол оюнда этген чакъы атышывгъа, онда атылгъан чакъы затгъа къарагъан адамны дав юрюле буса ярай деп эсине гелер эди.

Россияны ЦСКА командасы Англияны «Манчес­тер Сити» командасы булан Москвада ойнайгъанда, стадиондагъы къаравчулар къара бетли футболист Яя Турени маймун йимик къычырып мысгъыллайгъанын телевидениеден дюньяны кёп ерлериндеги халкъ гёрдю. Россияны къутургъан къаравчуларын енгмек учун, Европаны футбол союзу гелеген оюнну ЦСКА къаравчуларсыз оьтгережек деп къарар чыгъаргъан. Олар этип болагъан такъсырлав шо. Россиядагъылар буса: «Болду шолай питнечилик. Болса не бола, къавгъа гётерме чакъы мунда не бар?» – деп ойлашалар. Шо мысгъыллавну, хорлавну этгенлени табайыкъ, тута­йыкъ, такъсырлайыкъ деп бир чара сама гёрюлмей.

Шо саялы Россияны стадионларында фашистлени ишарасы булангъы байракъ елпиллей, шо саялы динге инанагъанлар, олай да савлай халкълар хорлана. Амма оланы алдын алма герекли къурумлар ва о къурумланы ёлбашчылары бир зат да болмагъандай гьайсыз туралар.

2018-нчи йылда Россияда футбол оюндан Дюньяны чемпионаты оьтгерилме герек. Россияны стадионларында тувулунгъан гьалгъа къарап, тыш пачалыкъланы футболистлери, тренерлери ва бир-бир футбол къурумлары Россияда чемпионатны оьтгермекге къаршылыкъ билдирип чакъырывлар этелер.

Спортдагъы миллетчиликге къарагъанда, Россияны тийишли къурумлары тувулунгъан гьалдан бир натижа сама чыгъармай.

Авторизация
*
*
Регистрация
*
*
*
Согласны с условиями сайта?
Генерация пароля