Макътавлу лётчик ата юртунда

 

Зайналгьамит Атаев – Уллу Ватан давну ортакъчысы, Къара Къараев ёлбашчылыкъ этеген атлы полкну взводуну командири болуп къуллукъ этген лейтенант Агъалатип Атаевни авлети. Зайналгьамит ата юртунда толмагъан орта билимлер алгъан сонг, Буйнакскидеги 1-нчи педагогика училищеге охума тюше ва 1964-нчю йыл  эсгерилген охув ожакъны бешге охуп битдире.
    Шо йыл Зайналгьамит Совет асгерни сыдыраларында къуллукъ этмеге гёнгюллю кюйде гете. Военный комиссия жагьил уланны савлугъун-гьалын яхшы тергеп чыкъгъан сонг, чыныкъгъан къаркъаралы Зайналгьамитни Ейск шагьардагъы военный лётчиклер гьазирлейген оьр авиация училищеге охума йибере.
    Шонда 4 йылны ичинде Зайналгьамит охувда алгъан билимлерин сынавда да бек уста кюйде къоллама бажаргъан.
    1968-нчи йылда З. Атаевни жигерлигин гёрюп, ону билимлерин дагъы да бек камиллешдирмеге Совет асгерлени Германиядагъы 19-нчу Гвардия авиация полкуна йиберелер.
    1975-нчи йылда асгер къуллугъуну отличниги З. Атаев Ю. Гагаринни атындагъы Асгер-Гьава академиясына охумагъа къабул этиле. 1978-нчи йыл ол шо оьр охув ожакъны подполковникни чининде  битдире. Ону бай биографиясы муну булан да тамамланып къалмай. Бизин якълы асгер лётчик Зайналгьамит Атаев 1979-нчу йылда къоркъунчлу савутланы алып юрюйген СУ-17М4 деген самолётланы сынавларын оьтгере. Шолай сынав оьтгеривлени бирисинде ону самолётуну мотору токътап къала. Шо къыставуллукъда лётчик самолётун чалтлыкъда адамлар яшап турагъан ерден хыйлы арекге чыгъарып, ерге тюшме 150 метр мезгил къалып турагъанда катапульт этип, сав къалма бажаргъан. Эсгерилген къоччакъ  иши учун огъар Макътавлукъну ордени тапшурула. Макътавлу лётчикни олай савгъатлары дагъы да кёп бар.
    Ол бир нече йыллар Луганскидеги оьр асгер авиация училищеде дарслар юрютген. Зайналгьамит Атаев асгер авиациягъа яшавуну 29 йылын багъышлагъан.
    1994-нчю йылдан берли ол МЧС-ни Дагъыстан Республикада иш гёреген, Ватандаш оборонагъа ва къувунлу гьаллагъа къарайгъан центрыны начальниги болуп чалыша.
    Оьр Къазаныш юртну 2-нчи школасыны охувчулары шо гюнгю ёлугъувда З. Атаевни яшаву ва яратывчулугъу гьакъда кёп къужурлу маълуматланы малим этдилер. Зайналгьамит Атаев ва ону яшав ёлдашы Сакинат  охувчуланы билимине, слайдларда гёрсетилеген материалларына къарап бек кеп алдылар. Ёлугъув юрюлген заманны ичинде Зайналгьамит Агъалатиповични савлай яшаву гёзден гечирилди. Ёлугъув бек къужурлу оьтдю.
    Ёлугъувну ахырында охувчу къызлар муаллим Т. Набиеваны къасты булан уьйренген «Булакъ башда» деген бийивню гёрсетдилер.
    Школаны директору Гь. Алисултанов З. Атаевге ва ону яшав ёлдашына булай къужурлу ёлугъувда ортакъчылыкъ этгени саялы баракалла билдирип сёйледи.

Б. НУРУТДИНОВА.

Авторизация
*
*
Регистрация
*
*
*
Согласны с условиями сайта?
Генерация пароля