К. САЛГЕРЕЕВ:

Хасавюрт шагьарны жумамежитини имамыны заместители Камилгерей Салгереевге 44 йыл бола. Сирияны тахшагьары Дамаскдагъы ислам университетни шариат факультетин 2003-нчю йылда битдирген. Хасавюртдагъы Ашарини атындагъы Ислам университетни дарс беривчюсю, «Дин ва яшав» деген телеберилишни де юрюте.

 

– Мени биринчи суалым бусурманлар къоягъан сакъалны гьакъында. Ону оьлчевю гьакъда адамлар тюрлю-тюрлю кюйде ойлашалар…

 

– Бир башлап, гьар адамгъа къыркъма сакъал къоймакъ – сюннет. Сакъалны не къадарда оьсме къоймакъ деген зат бир ерде де язылмагъан. Экинчилей, сакъалны таза сакъламакъ – гьар бусурманны борчу.

 

– Гьали тиштайпалар гьижап гиелер. Бирлери чи бек чырмалып юрюйлер. Шо гьакъда не айтма боласыз?

 

– Гьижап гьар бусурман тиштайпагъа гийме гёрсетиле. Тек айтардай кёп чырмалма герек деп тутма тюшмей. Бусурман гийимлер гьали кёп бар. Шоланы тиштайпалар тюз сайлама герек.

 

– Суннитлени ва шийитлени арасында болагъан эришивлюклени де эсгермей болмайман…

 

– Суннитлер де, шийитлер де – бусурманлар. Оланы бир-биринден айырып, арасына питне салмакъ уллу гюнагьгъа санала. Питне салагъанлар да янгыз бусурманлар тюгюл. Мунда политика чалышывчулар да оьзлени «къошумун» этелер. Арагъа эришивлюк салалар. Бусурманланы башын айландыралар, башгъа ёлгъа салма къарайлар. Суннитлер де, шийитлер де 1400 йыл къыйышып яша­гъанлар. Тек США-ны башчыларыны къарарына гёре, Иракъгъа сугъулуп, оланы арасына татывсузлукъ салдылар. Шондан ондагъы бусурманлагъа нечакъы зарал болгъан, болуп да тура. Айтагъаным, Американы башчыларыны муратлары бусурманланы башын айландырмакъ, адашдырмакъ эди.

 

– Межитлерде мен эс этген затны айтма сюемен. Намаз жувунуп турагъанлар бар ерге гелип «салам» берелер. Шолай этме яраймы? Межитни ичинде ятып юхлама яратыламы?

 

– Шолагъа къысгъача жаваплар берейим. Намаз жувунуп турагъан адамланы уьстюне баргъанда, «салам» берип, оланы тергевюн тартмакъ деген зат ёкъ. Арып-талып, гирип межитни ичинде янтаймакъ ярала.

 

– Намаз жувунагъанда къолланагъан сувну оьлчевю гьакъда да хабарлайыкъ…

 

– «Сен денгизни ягъасында бусанг да, намаз жувунагъан сувну кёп къоллама», –  деген гьадис бар. Шо саялы намаз жувунагъанда сувну кёп къоллама тюшмей. Гьар затны оьз оьлчевю бар. Бусурманлар бир башлап тазалыкъгъа кёп тергев берме герек. Гьар бусурманны къаркъарасы, опурагъы ва юреги таза болма герек.

Биревлер динни фанатиклери болуп къалалар… Ислам динде олай болма ярамай. Оюнг да, сёзлеринг де, юрегинг де таза болма герек. Аллагьны сюймек, огъар гьар гюн алгъышлар этмек – бусурманны борчу.

Яхшылыкъ, рагьму – бусурманларда даим болма герек къылыкълар. Тек бусурманман деп, тёшюне къагъып турма тюшмей. Бир тюрлю рагьмулу ишлер эт. Хоншудагъы тамазаны абзарын тазала, бавуна каза ур,  аптекден дарман алып бер. Гьона, о уллу рагьмулукъ деп санала. Шону бир-биревлер унутуп къалалар.

 

Измулла ГЬАЖИЕВ.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля