Байрам чараны ачды ва юрютдю Дагъыстанны миналы халкъларыны ассамблеясыны председателлерини бири – Руслан Расулов. Ол эсгерген кюйде, Дагъыстанны миналы халкъларын бирлешдирмек учун оьтгерилеген бу чара шо къурумну Москвада болгъан ассамблеясында къабул этилген.
Дагъыстанны миналы халкъларыны ассамблеясыны экинчи сопредседатели Гьажи Мирзаев оьзюню сёйлевюнде эсгерген кюйде, буссагьатгъы вакътиде Дагъыстанда 28 миллет бар. Оланы янгыз он дёртюн Дагъыстан Республиканы гьакимияты миналы аслу халкълагъа санагъанын дурус гёрмеймен. Олай янашыв дурус болмас. Неге тюгюл, гьар миллет оьзюню онгачалыгъын сыйлай ва башгъа халкъланы даражасындан оьз халкъын тёбен гёрмей. Халкъ – бир заманда да такрарланмайгъан аламатланы бириси. Бу байрамны оьтгермек булан дагъыстан халкъланы къуруму бирлешивню ва дослукъну гёз алгъа тута. Олай да, халкъланы арасында разисизлик болмасын учун гьар миллетни оьзтёрече адаты, хасияты, тарих мердеши барны гьакъында айтды. Дагъы да ол, къыйынлы гюнлер къопгъанда, Дагъыстанны халкълары елевчюлеге биригип къаршы тургъанны эсгерди.
Байрам чараны концерт программасын Таргъу юртну къызларыны «Юлдузлар» деген ансамбли ачды. Къумукъ ва Темиркъазыкъ Кавказ халкъланы бийивлерин олар сагьнагъа чыгъып дагъы да бир нече керен гёрсетип, жыйылгъанланы сюювюн ва узакъ харс урувларын къазандылар.
Байрамда ортакъчылыкъ этген къумукъ вакиллени гьакъында айта туруп, шиърулар охугъан агъачавуллу къызъяшлар Камила Муртазалиеваны ва Шуванат Наруеваны эсгерме сюемен. Оланы бириси охугъан шиъруда «Къылыч булан языла о тавлагъа» деген сёзлер Дагъыстанны халкъларыны игит мердешлерин, елевчюлеге бирликде къаршылыкъ билдиргенин исбатлай.
Дагъыстанны миналы халкъларыны байрамыны аслу борчу аз санавлу халкъланы саният усталыгъын гёрсетмек эди. Шо борчну кюте туруп, миналы халкъланы вакиллери Гьайдакъ райондан гелген Жамиля Омарова дарги йырны йырлап, олай да андили гиччи къызъяш Маржанат Умаханова, лезгили Алихан Межитов, лаклы Жанна Къурбанова, аварлы Къайырбий Къайырбиев оьзлени йырларын, бийивлерин гёрсетдилер, шиърулар охудулар. Оьзю яратгъан макъам согъагъан алат булан гьайдакълы Магьаммат Магьамматов жыйылгъанланы таныш этди ва шо алат булан оьзю кюйлер де сокъду.
Байрам чарада ахвах, карата, дидой, анди ва башгъа халкъланы вакиллери ортакъчылыкъ этди. Байрам чараларда актив кюйде ортакъчылыкъ этгенлер дипломлар булан савгъатланды.
Шулай жамият байрамлар республиканы халкъларыны аралыгъын беклешдиривге, дослугъун, татывлулугъун гючлендиривге таъсир эте.
Абдулманап ГЬАМЗАЕВ.
