«Дав йылланы йырлары»

Дарс Юрий Левитанны «Уллу Ватан дав башлангъан» деген билдиривю булан ачылды ва «Священная война» деген совет солдатланы ругьландыргъан ва оланы душманлагъа къаршы ябушмагъа гюч берген йырны белгили макъамы чалынды. Лебедев-Кумачны «Священная война» деген шиърусу давну биринчи гюнюнде газетде язылып чыкъгъан ва шо гюн огъар гёре белгили композитор А. Александров макъам язып, радиодан таба йырлангъан. Шо йыр узакъ 4 йылны боюнда совет халкъ фашист елевчюлеге къаршы юрютген азатлыкъ давну гимни гьисапда танылгъан.

    Ери гелгенде мен бирдагъы бир затны эсгермеге сюемен, шо гюн ачыкъ дарсда уллу уста кюйде охувчулар дав йырланы йырлап къоймадылар, олар гьар йырны тарихин де айтдылар. Шо буса дарсгъа гелгенлени дагъыдан-дагъы иштагьландырды. Неге тюгюл де, ялынлы давда тувгъан йырланы агьамиятлыгъы бугюн де тайма­гъан: гьали де давну агьы элибизни халкъыны эсинден таймай.

    Ачыкъ дарс 7–8-нчи класланы ортакъчылыгъы булан этилгени де негьакъ тюгюл деп эсиме геле. Бугюн Бабаюрт районда давну ортакъчылары къалмагъан. Давну ахырынчы къагьруманлары гетген йылны къышында герти дюньягъа гёчдюлер. Амма Уллу Ватан давну ва 30 миллионгъа ювукъ адамын тас этген Совет Союз къазангъан Уьстюнлюкню инкар этмеге, тарихни башгъа ёлгъа гёчюрмеге къарайгъанда, бир-бир уьлкелерде ачыкъдан-ачыкъ фашизмни идеологияларын якълайгъанда, оьсюп гелеген яш наслугъа тюз маълумат бермеге, оланы яшдан тутуп  патриот ругьда тарбияламагъа гереги ачыкъ. Шо якъдан алгъанда, оьзю­ню аслу темасы дав йылланы йырлары болгъан ачыкъ дарсны бек таъсири болду демеге ярай.

    Яшлары уста кюйде йырлагъан гьар йыр, чалынгъан гьар макъам гёзьяшланы оьзлюгюнден акъдырды. Дав шинеллер ва пилоткалар гийген яшланы гёрген сайын, бизин уллу аталарыбыз оьзлени санларын сёкген давну акъубасын гёз алдыбызгъа гелтирди. Яшлар давну вальсын бийидилер, сагьнада уста кюйде салынгъан белгили фильмлени игитлерини келпетлерин яратды. 

    «Катюша» деген йырны къайсыбыз билмейбиз? Шо йырны гьатта школада йыр дарсларда да уьйрете. Амма охувчу яшланы тилинде шо йыр къулакълагъа нече де арив, нече де янгы кюйде чалынды.

    Ачыкъ дарсны ахырында буса охувчу яшлар белгили Дагъыстанны халкъ шаири Р.Гьамзатовну давда оьлген бары да солдатланы эсделигини гимни болгъан «Турналар» деген шиърусун язмагъа ругьландыргъан америкалы атом бомба атылгъан Хиросима шагьарлы къызны яшаву гьакъда айтдылар. Гьар сёз, гьар жумла юреклени теренинде яшынгъан гьислени уятды, яшавгъа башгъа гёзден къарамагъа уьйретди.

    Ачыкъ дарсны жамын чыгъара туруп, Бабаюртдагъы А.Арзулумовну атындагъы 1 номерли орта школаны директору Мугьажир Гьажимуратов дарсны ортакъчыларына разилик билдирди. Оьзюню сёйлевюнде кёп къуллукъланы кютеген яшёрюмлени центрыны директору Гьасан Османов буса яшланы муаллимлерине ва оланы ата-аналарына да баракалла билдирди.

    – Мен инг башлап сизин клас ёлбашчыларыгъызгъа ва ата-аналарыгъызгъа баракалла айтмагъа сюемен, – деди Гь.Османов. – Олар яшдан тутуп сизин юреклеригизде патриот ругьну уятмагъа болгъанлар. Биз барыбыз да бизин ортакъ уьстюнлюгюбюзню, бизин ярыкъ гележегибиз учун оьзлени жанларын аямагъанланы  эсде  сакъламагъа борчлубуз.

Герейхан ГЬАЖИЕВ,

бизин мухбирибиз.

Эсделик сурат.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля