Чернобыльдагъы аварияны 31 йыллыгъына

ОЬЛГЕНЛЕР БАШЛАП ЭСГЕРИЛДИ

Гьар йыл, 26-нчы апрелде, Чернобыльда болгъан хатабалагьны эсге ала. Алмасдай да тюгюл, 1986-нчы йылда дюньяда биринчи дегенлей къопгъан балагьны алдын алма сав уьлкени халкъы ортакъчылыкъ эте. Атом станцияны атылывуну натижаларын тайдырмакъ учун савлай Союздан адамланы чакъырма башлай. Шо чакъырыв булан Дагъыстандан да Чернобыльгъа эки мингден де артыкъ адам баргъан. Савлай Союздан буса шо балагьны тайдырывгъа 600 минг адам къуршалгъан.

__________________________________________________________________


26-нчы апрелде Хасавюрт районну администрациясыны залында шо агьвалатгъа багъышлангъан чара оьтгерилди. Шонда чернобылчыланы 20-ву ортакъчылыкъ этди.


Жыйылгъанланы алдында сёйлей туруп, Хасавюрт район администрацияны ишлерини управляющийи Муслим Алисолтанов Чернобыльны балагьын тайдырывда ортакъчылыкъ этгенлени игитлер булан тенглешдирди.


-1986-нчы йылда халкъгъа балагьны закъуму гьали чыгъып тура, — деди ол. Районда Чернобыльны къара балагьын тайдырывгъа баргъанлагъа пачалыкъ савгъатлар берилген: бешевге «Мужество» деген орден, тогъузав буса «За Отвагу» деген медаллар булан савгъатлангъан. Мен сизин району башчысы Жамболат Салавовну атындан да гьакъ юрекден къутлайман ва яшавда насип ва къатты савлукъ ёрайман!


Хасавюрт район администрацияны ишлерини управляющийини орунбасары Айна Бабаева, район башчысы Ж.Салавовну къолу салынгъан къарарны охуду, шонда Чернобыльда болгъанлагъа Гьюрметлев грамоталар ва Баракалла кагъызлар берилди.


Халкъны социальный якъдан якълайгъан управлениени начальнигини ишлерин кютеген Махтибек Махтибеков айтагъан кюйде, Чернобыльда райондан 100-ге ювукъ адам чакъырылгъан., шоланы кёбюсю бугюнлерде биринчи, экинчи ва уьчюнчю группаны сакъатлары.


-Бугюнлерде районда Чернобыльда ортакъчылыкъ этген 54 адам яшай, шолар барысы да орденлер-медаллар булан савгъатлангъан.


«Мужество» деген орден алгъанлар:


1.Мавлади Адылов – Нурадилово юрт;


2. Мурат Зарарьяев – Тотурбийкъала;


3. Элбрус Кукуев – Хамавюрт


4. Руслан Мингишиев – Эндирей


5. Байсолтан Солтангишиев – Ботаюрт.


Чернобыльда болгъанланы 45-вю сакъат болгъан, 5 тиштайпа эрсиз къалгъан. Шоланы 25-вюне яшав гьалларын яхшылашдырмакъ учун харж берилген. Чернобыльда болгъан 45 сакъатгъа, дагъы да «Маяк» деген ерде къарабалагьны тайдырывда ортакъчылыкъ этген дёртевге, шолай да 14 йыл болмагъан 23 яшгъа ашамлыкъ маллар алмакъ учун харж да бериле.


Мавлади Адылов Чернобыльда болгъанланы атындан сёйлей туруп, башлап Чернобыльны агъысундан оьлгенлени эсге алды. Бары да кёмек башлап шолай агьлюлеге этилме герекни айтды. Сонг ол Дагъыстанны загьматны ва социальный оьсювню министрлигине, район администрациягъа, районну халкъларын социальный якъдан якълайгъан управлениеге оьзлени баракалласын билдирди.


Жыйынны ахырында ортакъчылар эсделик сурат алдырдылар.


Гебек КЪОНАКЪБИЕВ.

Оьз мухбирибиз

Суратда: Чернобыльда болгъанланы эсделик сураты.



Авторизация
*
*
Регистрация
*
*
*
Согласны с условиями сайта?
Генерация пароля