9 декабр – Ватанны Игитлерини гюню

Уьлкени башчысыны оьрде эсгерилген къарары гьали-гьалилерде къабул этилген буса да, ону тарихи асруланы теренинден баш ала. Ачыкълашдырып айтгъанда, XVIII асруда, демек, 1769-нчу йылда II Екатерина оьзюню къарары булан Григорий Победоносецни орденин тасдыкъ этген. Орденни токъташдырыв ол пача тахында олтургъан девюрюню инг де гёрмекли агьвалатларындан бириси гьисаплана.  Шо оьр савгъат янгыз дав майданларда оьр даражадагъы къоччакълыгъын, игитлигин, оьз элине бакъгъан якъдагъы аминлигин гёрсетмеге болгъан инг гёрмекли асгер къуллукъчулагъа тапшурула болгъан.

Эсгерилген шо орденни дёрт даражасы белгиленген болгъан. Орденни биринчи даражасы айрокъда абурлу гьисапланып гелген. Тек орденни бары да дёрт даражасы булан бир нече адам тюгюл савгъатланмагъан.

Шолайлыкъда, Ватанны Игитлерини гюню Октябр инкъылап болгъунчагъа белгиленип тургъан. Белгили кюйде, шо агьвалатдан сонг эсгерилген орден ва байрамны белгилев гери урулгъан.

Арадан 80 йыллар оьтюп, РФ-ни Президентини къарары булан шо орден ва ону абур даражасы къайтып мекенли этилген. Орден оьзю де оьр даражадагъы асгер савгъаты гьисапда къайтарылгъан. Россияда шо гюн герти игитлер гьюрметленип геле. Тек байрамны маънасы алдынгъы девюрлерини игитлерин гьюрметлев булан дазуланып къалмай. Гьали заманны игитлерин,  демек, Совет Союзну ва Россияны Игитлерин, олай да Социалист Загьматны Игитлерин абурлавгъа айрыча тергев бакъдырыла.           

Бизин уьлкени тарихин (1992-нчи йылдан тутуп) гёз алгъа тутгъанда, Россия Федерацияны Игити деген оьр атгъа 600-ден артыкъ адам лайыкълы болгъан. Оланы арасында буссагьатгъы вакътиде Россияны Савутлу Гючлеринде къуллукъ этивюн узатып турагъанлар да бар.

Бизин республиканы айрыча алгъанда, Дагъыстанда бугюнлерде Россияны 5 Игити яшай. Олар – Магьаммат Гьюсенович Баачилов, Магьаммат Османович Гьамзатов, Магьаммат Магьмутович Гьимбатов,  Загьит Асмалавович Загьитов, Зулкъаит Гьюсейнович Къайитов. Социалист Загьматны Игити деген гьюрметли атгъа ес болгъанлар да 8 бар. Олар – магьачкъалалы Магьаммат Махулович Махулов ва  Хамис Абдусаламовна Къазиева, Къызылюрт шагьарлы Сайпулла  Магьамматович Абакаров ва  Аминат Магьамматрасуловна Исалова, Къызлар райондан Клавдия Иосифовна Алимова, Къазбек райондан Магьаммат-Запир Исмайылович Гереев, Лаваша райондан Магьаммат Хизроевич Керимов, Дагестанские Огни шагьардан Гебек Алиевич Насруллаев. Олагъа барысына да бир йимик абур-сый, макътав тийишли.  

Ватанны Игитлерини гюню, бир де къопдурувсуз айтгъанда, бизин учун агьамиялы тарх гьисаплана.  Шо тарх бизин уьлкени игитлери не йимик къоччакълыкълар гёрсетгенин эсге алмакъдан къайры да, тарихи эсибизни сакъламагъа да шартлар ярата. Ватанны Игитлерини гюню йимик эсделик тархын белгилев бизге тарихи гертиликни къайтармагъа болушлукъ этежекден къайры да, торайып гелеген яш наслуну тувуп оьсген элин сюювню ругьунда тюзевлю тарбияламакъ учун гележекде ёллар ачажагъына бир де шеклик этмеге тюшмей.

 

Политика ва маълумат бёлюк.

Авторизация
*
*
Регистрация
*
*
*
Согласны с условиями сайта?
Генерация пароля