Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Гележек къысматын гёз алгъа тута

Гележек къысматын гёз алгъа тута



      Алданокъ тасдыкъ этилген план-графикге кюрчюленип, бизин районну юрт хозяйство предприятиелеринде коллектив дыгъарланы масъаласыны айланасында жыйынлар оьтгеривге байлавлу чаралар тамамланды. Савлай алгъанда, шолар низамлы ва къурумлу оьтдю демеге ярай.


Март айны 19-нда, талатгюн, «Оьтемиш» деген пачалыкъ унитар предприятиени жыйынлар юрюлеген залында да уллу жы­йын оьтгерилди. Шонда ерли хозяйствону профсоюз къурумуну 52 членинден 49 адам ортакъчылыкъ этди. Хозяйствону бары да жаваплы касбучуларындан башлап, контор къуллукъчуларына ерли чечилеген масъалаланы къысматына жаны-къаны авруп, уьстевюне де, хозяйствону гележек тюрленивюн ойлап, шо гюн жыйылгъан эдилер десем, бир де къопдурув болмас.


Коллектив дыгъарны яшавгъа чыгъыву ва 2018-нчи йылны гьасиллери гьакъда гьисап бере туруп, «Оьтемиш» деген пачалыкъ унитар предприятиени директору Арсланали Ибрагьимов булай деди:


– Бизин хозяйствону татывлу загьмат коллективини оьтген йылгъы чалышывуну гьасиллери яман болмады. Хозяйствону профсоюз комитети булан байлангъан коллектив дыгъарны яшавгъа чыгъарма бажарылды.


Районну оьзге хозяйстволарында йимик, бу хозяйствода да юзюмчюлюк – аслу гелим береген тармакъ. Юзюм бавланы майданы мунда 137 гектарда ерлешген. Шоланы 87 гектары толу тюшюм бере, 30 гектары – яш бавлар, оланы арасында ижарагъа берилген майданлар да бар. Оьтген йылны гьасиллерине гёре толу тюшюм береген бавлардан 7420 центнер юзюм алынгъан. Гьар гектаргъа пайлагъанда онча кёп тюгюл буса да, 2017-нчи йылны натижалары булан тенг­лешдиргенде, 13 центнерге артыкъ бола.


Ашлыкъ оьсдюрювчюлени гьаракаты булан 500 гектар майдандагъы гюзлюк­лерден 10394 центнер ашлыкъ къайтарылгъан. Оьсюмчюлюк тармакъда 1514 минг манат таза хайыр алынгъан.


Гьайванчылыкъ тармакъдагъы ишлени барышы гьакъда хозяйствону ёлбашчысы А. Ибрагьимов эсгерген кюйде, оьтген йыл 1104 центнер сют болдурулгъан. Гьайванчылыкъ продукталар 3042 минг манатгъа сатылгъан.


2018-нчи йыл сатылгъан юрт хозяйство маллардан 1328 минг манат хайыр алынгъаны имканлыкъ яратгъан. Бу йылны башындан тутуп, январ булан февраль айлагъа, хозяйстводагъы бары да ишлейгенлеге айлыкъ алапалар берилген, 4782 минг манатны къадарында гьар тюрлю налоглар тёленген. Бугюнге ерли алапалар беривде ва налоглар тёлевде хозяйствону борчлары ёкъ.


Оьзюню гьисап берив док­ладында А. Ибрагьимов юрт хозяйство техниканы гьалы ва механизаторланы, шофёрланы ишлери гьакъда уллу иштагьлыкъ булан хабарлады. Ону айтывуна гёре хозяйствону техника базасы бир нече йыллар алда бек осал болгъан. Оьтген йыл «МТЗ-82» маркалы трактор, ишчилер учун 2 автобус, специалистлени талапларын гьисапгъа алып, 4 автомашин, 3 сеялка, 1 дарман себеген, 1 ашлыкъ юклейген ва топуракъны тырнайгъан 9 метрли 18 тырнавучу булангъы 1 трактор ва оьзге техника сатып алынгъан.


Артда да А. Ибрагьимов эсгерген кюйде, Бурдеки юртдан баш алып, 37 мезгилден быргъылар булан сув гелип, 400 минг кубометр сув сыягъан гьавуз ишге берилген. Бугюн шондан хозяйствону юзюмчюлери, айры ижарачылар ва хоншу хозяйстволаны загьматчылары да пайдалана.


– Ишчилерибизни, халкъыбызны ва юртубузну социал масъалаларын чече туруп, оьтген йыл 851 минг манат гёрсетме бажарылды, – дей ёлбашчы. «Бу йылны тюшюмю учун хозяйствода 550 гектаргъа гюзлюклер чачылгъан, 720 гектар ер ижарагъа берилген, къалгъан ишлетилеген топуракълар сюрюлюп ургьагъа къоюлгъан. 2019-нчу йыл гюзлюклерден 14000 ва юзюмден де 7000 центнер тюшюм къайтарма умут бар.


– Хозяйствону гележек къысматы – бизин къолубузда, – деп башлады оьзюню сёйлевюн проф­союз къурумуну председатели Кепияханум Айбатырова. – Бугюнюн, ону тангаласын ва йыракъдагъы талайлы дазусун ойламакъ – бизин сыйлы борчубуз. Шону гьисапгъа алып, биз 2018-нчи йылда къабул этилген коллектив дыгъарны яшавгъа чы­гъарывгъа гьайлы янашып, мекенли иш гёрдюк, ёллар ахтардыкъ. Бизин хозяйствону ёлбашчысы Арсланали Къурбаналиевич ишлейген адамланы бары да яшавлукъ къуллукъларына даим къол ялгъап ва берген сёзюнде де табылып тура.


Жыйында чыгъып сёйлеген хозяйствону гаражыны заведующийи Бават Гьажиев, баш инженер Агьматхан Агьматханов, юзюмчюлюк бригаданы ёлбашчысы Умжагьан Магьамматова, сугъарыв ишлеге жаваплы касбучу Осман Алишихов, ижарачы Шамил Халикъов, ерли орта школаны директору Зумурут Сайитова, баш агроном Мирза Гьажиев ва оьзгелер арагъа салынып ойлашына­гъан масъалалагъа гёре оьзлени ойларын айтдылар ва пайдалы таклифлерин бердилер. Проф­союз къурумну председатели К. Айбатырова йимик олар да хозяйствону башчысы Арсланали Ибрагьимовну ишлерине разилигин билдирди ва коллектив дыгъаргъа гёре оьтгерилген чаралагъа орта багьа бердилер.


Жыйынны ишинде «Къаягент район» деген ерли гьакимлигини башчысыны экономика-финанс масъалаларына къарайгъан орунбасары Геге Агьматова, Къаягент районну юрт хозяйство управлениесини касбучусу Абдулла Мустапаев, агропромышленный комплексини къуллукъчуларыны район комитетини профсоюзуну председатели Солтанали Идрисов ортакъчылыкъ этди ва чыгъып сёйледи. Сёз ёругъуна, оланы сёйлевлерини аслу маънасы ва таклифлери хозяйствода ишлейгенлени санавун артдырыв, иш ерлер болдурув, ишчи адамны ва юртну халкъыны социал масъалаларын кютювге бакъгъан тергевню гючлендирив ва оьзге тюрлю масъалалар булан байлавлу эди.


Загьмат коллективни жыйынында хозяйствону директору А. Ибрагьимов кёп йылланы узагъында намуслу ишлеп турагъан ва хозяйствону экономикасын беклешдиривге аслам къошум этеген загьматчылагъа гьюрметлев грамоталар тапшурду.


Жыйынны ортакъчылары этилген ишлеге орта багьа берип, хозяйствону профсоюз къурумуну янгы составын ва районну АПК-сыны ишчилерини проф­союзуну конференциясына делегатлар сайладылар.



М-З. ТЕМИРБЕКОВ, хас мухбирибиз.

Суратда: хозяйствону ёлбашчысы Арсланали Ибрагьимов.

Автор чыгъаргъан сурат.



Количество показов: 99
Автор: YOLDASH.news
26.04.2019 14:20
Подписывайтесь на канал yoldash.ru в

Возврат к списку


Добавить комментарий

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта