Белгили экени йимик, бизин уьлкени тарихини янгы девюрюнде, демек, Совет Союзу тозулгъан сонг, Россияны пачалыкъ белгилерини бириси гьисапда уьч тюслю байрагъы токъташдырылгъан. Ачыкълашдырып айтгъанда, РСФСР-ни Оьр Советини депутатлары 1991-нчи йылны август айыны 22-синде, Россияны милли байрагъыны гьакъында къарар къабул этген. Шо къараргъа РСФСР-ни Оьр Советини Председателини биринчи заместители Руслан Хасбулатов къол салгъан.
Россияны пачалыкъ белгиси гьисапда уьч тюслю байракъ 1991- нчи йылны ноябрь айыны 1-инде тасдыкъ этилген. Арадан заман гетип, 1994-нчю йылны август айыны 20-сында Россияны Президенти Борис Ельцин «Россия Федерацияны Пачалыкъ байрагъыны гюнюне» байлавлу указгъа къол салгъан. Шонда эсгерилегени йимик, байракъны гюню гьар йыл август айны 22-синде оьтгериле. Тек байракъны гюню генг кюйде биринчилей 2007-нчи йылда белгиленген.
Россияны байрагъыны уьч де тюсюню гьарисине бир маъна бериле: акъ тюс – парахатлыкъ, тазалыкъ, гёк тюс буса – инамлыкъ ва ачыкъ кёк, къызылы да къанны тюсю – къоччакълыкъ, игитликни белгиси.
Пачалыкъ байракъны гюнюне байлавлу чаралар уьлкени бары да регионларында йимик, бизин республикада да хас кюйде оьтгерилип геле. Шолай, Магьачкъалада ва оьзге шагьарларда ва юртларда белгили йыравланы ва чебер иш гёреген коллективлени ортакъчылыкъ этивю булан концертлер оьтгериле. Шондан къайры да, яшёрюмлени ва жагьиллени къуршап, шо тархгъа байлавлу оьзге гьаракатлар да оьтгерилежек деп къаравуллана.
Н. БАЙБОЛАТОВ.
