Буйнакск райондан чыкъгъан уьлкебизни кёп ерлеринде яшайгъан ва ишлейген кёп ватандашларыбыз бар. Шолай, Ставрополь крайны Курск районундагъы Привольный юртунда яшайгъанланы бир пайы – эрпелилилер. Олар мундагъы колхозда авлакъчылыкъ, гьайванчылыкъ, малчылыкъ тармакъларда ишлей туруп, оьзлени яхшы янындан гёрсетме бажаргъанлар ва буссагьатда да ким-ким де сукъланардай уьйлер къуруп, гьайван-малгъа, оьз еслигиндеги ашлыкъ чачыв пайларына къуллукъ этип, гьалал кюйде яшавлукъ этелер.
Илмутдин ва Айшат Лабазановланы агьлюсю де – Привольный юртгъа 70-нчи йылларда гёчюп яшавлукъ этме башлагъан агьлюлени бириси. Колхозну жынслы къой фермасындагъы жаваплы ишлени бойнуна алып, намуслу кюйде яшавгъа чыгъарып чалышагъан бу агьлюде арт-артындан 4 улан тува. Йыллар гете туруп, яшлар оьсе, тарбия-билим алалар, гьариси оьз ёлун, касбусун танглап, агьлюлер къуруп, татывлу яшав юрютелер.
Илмутдинни ва Айшатны уьчюнчю уланы Элдар 1982-нчи йылда тувгъан. Привольныйдеги толмагъан орта школада 9 класны битдиргенден сонг Янгыкъумукъдагъы школада охуп орта билим алгъан. Дагъыстан пачалыкъ педагогика университетни юристлер гьазирлейген факультетин оьр къыйматлагъа тамамлагъан ва 2006-нчы йыл Привольныйге къайтып, ерли школада муаллим болуп дарслар юрютме башлагъан.
Шо йылны июн айында Элдар контракт язып асгерде къуллукъ этме гете. Оьтген йылланы ичинде ол хас тапшурув булан барып ортакъчылыкъ этмеген дав гьаракатлар ёкъдур деп айтма да ярайгъан кюйде. Элдар Мычыгъыш Республикада, Ингушетияда, Къабарты-Балкъарияда болуп гетген дав къалмагъалланы басылтывда да ортакъчылыкъ этген. Артдагъы вакътиде буса ол Донецк халкъ республиканы миллетчилерден тазалап, къоруп сакъламакъ учун юрюлюп турагъан хас дав гьаракатлагъа къуршалып, Ватанны алдындагъы борчун кютюп чалыша.
Уллаталаны асил мердешлерине аркъатаяп, авлетлерин де шо къылыкъ-хасиятгъа абур, гьюрмет этивню ёругъунда оьсдюрген сержант Элдар Лабазановну асгер ёлдашларыны арасында да яхшы абуру бар. Ол –айтгъан сёзюнде табылагъан, ёлдашына даим кёмек этме, къол ялгъама, гьар къайсы тапшурувну да ахырына чыгъарма гьазир турагъан сав уланлардан. Ондан къайры да, Элдарны гьаракаты булан, ондан уьлгю алып, агъасы Рашитни уланлары Уллубий ва Умалат асгерде къуллукъ этип къайтгъан сонг, дыгъар байлап, Ватанны якълавчуларыны сыдраларына къуршалгъан ва Донецк, Луганск халкъ республикаларда юрюлюп турагъан хас асгер операцияда ортакъчылыкъ этелер.
Милли гвардияны асгер бёлюклерини сыдраларында къуллукъ этеген йылларында Элдар Лабазанов лайыкълы болгъан савгъатлар да ону бажарывлугъуна шагьатлыкъ эте. Огъар «Асгер къуллукъда айрыча гёрсетгени учун» ва Армияны генералы В. Золотов оьз къолу булан тапшургъан «Макътавлугъу учун» деген 3-нчю даражалы медаллар берилген.
– Яшавубузну инг де яхшы йылларын биз асгерде къуллукъ этивге, Ватанны герти якълавчуларыны касбусуна багъышлап, тёшюбюзге медаллар, орденлер такъсын учун йибермейбиз. Амма Ватанны алдындагъы асгерлик борчун къанын-жанын аямай, намусу-ягьы булан кютегенлени гьар гюнлюк къастын, гьаракатын гёрюп, тийишли къыйматын берип болагъанлыкъ бирден-бир ругьландыра, – дей Эльдар.
Командирлер къысгъа болжаллыкъ отпускагъа йиберип гелген Элдар бугюнлерде агьлюсюню, дос-къардашыны аманлыгъын гёрюп-билип парахат болгъан сонг, асгер госпиталланы бирисинде савлугъун тергетип беклешдирмекни гьайында.
СУРАТДА: Элдар ЛАБАЗАНОВ.
