Юрекдесен, Афгъан дав!

«Дав» деген сёзню эшитсенг, къаркъаранг титирей. Неге тюгюл де, шо сёз булан къан тёгюлювлер, сан сёгюлювлер, гёзьяшлар байлавлу. Шо сёз биревге де яхшылыкъ гелтирмей. Дав халкъны арасына янгыз талчыкъны ва оьчлюкню урлугъун чача.

Дюньяны тарихинде кёп давлар болгъан. Амма Афгъан дав буссагьатда да ону ортакъчыларыны ва давгъа буйрукъ бергенлени арасында эришивлер тувдура. Тек бир зат ачыкъ: оланы барыны да къысматын байлагъан къагьрулу сёз, аччы сёз – дав.

Афгъан давну ортакъчылары учун 15-нчи февраль – эсде къалгъан гюн. Шо гюн 1989-нчу йылда Афгъанистан республикадагъы совет асгер бёлюклер Ватанына къайтды. Шо гюн билдирилмеген давну ахырынчы гюню болуп да токътады. Шо гюн 10 йылны боюнда белгисиз давда ортакъчылыкъ этген минглер булан саналагъан совет солдатлагъа парахатлыкъ алып гелди.

Афгъан давну таъсири Бабаюрт районгъа да тиймей къалмады. Белгисиз давда Бабаюрт районлу 80-ге ювукъ солдат ортакъчылыкъ этген. Бирлери сакъат кюйде, бирлери сав-саламат ата ожакъларына къайтгъанлар, бирлери даимликге дав майданда къалгъанлар.

– Афгъан дав битгенли 26 йыл бола­гъаны – бизин Ватаныбыз эсде къалагъан агьвалат, – деди Ж.Шайыбов. – 26 йыл алда совет асгерлени ахырынчы солдатлары 10 йылны боюнда узатылгъан давну отундан ана Ватанына къайтарылгъан. Сав къалгъанлар къайтгъан. Кёплер учун Афгъанистанны ят топурагъы ахырынчы тыныш алгъан ери болуп токътагъан. Оланы атларын унутмагъа бизин гьакъыбыз ёкъ.  Афгъан давну ортакъчылары оьсюп гелеген яш наслу учун ватанына аминликни уьлгюсю болажакъгъа шеклик этмейбиз.

 

Герейхан ГЬАЖИЕВ,

бизин мухбирибиз.

СУРАТДА: байрам мюгьлет.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля