Яшёрюмлер министр булан ёлукъгъан

Яшёрюмлени Ачыкъ гьукуматыны комитетини ёлбашчысы Магьаммат Гьюсейнов ювукъ арада печат ва маълумат тармакъгъа байлавлу яшавгъа чыгъарма тарыкълы проектлени гьакъында билдирген. Ол гетген йыл «Машук» деген яш наслуну Бютюнроссия форумунда грант утгъанны эсгерген.

–Шо проектге гёре телеберилишлер гёрсетмеге гёз алгъа тутулгъан. Шонда жагьиллеге къайсы буса да бир тармакъда нечик иш тапма болажакъны гьакъында англатыв берилежек. Мисал учун, экономика факультетде охуйгъан студент оьзю сюеген ишине тюшмек учун, нечик билими, негер тергев этме герекни гьакъында билме болажакъ,–деп англата Гьюсейнов.

–Биз шо берилишлени чыгъар­макъ учун Дагъыстан пачалыкъ университетини студиясы булан сёйлешгенбиз. Бир башлап 12 серияны гёрсетме сюебиз, – деп къошгъан Магьаммат Гьюсейнов.

Маълуматгъа ва печатгъа къарайгъан министр Рашит Акавов шо ойну оьзю де якълайгъанны айтгъан. Ол эсгерген кюйде, шолай гьаракатны школаларда 10-нчу класларда охуйгъан яшланы арасында юрютме тарыкъ. Неге тюгюл, олар шо чагъында   гележекге касбу танглама башлай.

Министр яш наслуну Ачыкъ гьукуматыны вакиллерине респуб­ликаны яратывчулукъ ва сиптечи яш наслуну да, оьзю башчылыкъ этеген министерликни де арасында байлавлукъ юрютмекни таклиф этген.

Шо ёлугъувну вакътисинде ана тиллени оьсювюне ва милли тиллерде чыгъагъан маълумат къуралланы яйылывуна байлавлу масъалаланы да гётерген.

–Республиканы кёбюсю школаларында ана тиллерден дарслар юрютмейген болгъан. Шолайлыкъда, милли газетлени охуйгъанлар, къоллайгъанлар аз бола бара, – деп билдирген Рашит Акавов.

Ону сёйлевюне гёре, шо масъала янгыз бир къурумгъа яда ведомствогъа тийип къалмай. Шо агьамиятлы масъаланы чечеген ёлларын ахтармакъ учун бары да къурумлар биригип, гючюн салып чалышма тарыкъны ачыкъ этген. Министр билдирген кюйде, бугюнлерде Магьачкъалада «Дагъыс­танны маълумат къуралларыны 2025-нчи йылгъа ерли оьсювю гьакъдагъы» сессия оьтгерилежек. Шонда да шо милли тиллеге байлавлу масъаланы айланасында сёз юрюлежек.

Ёлугъувну натижасын чыгъара туруп, март айны ахырында школаланы битдиреген охувчуланы да, биринчи курсгъа барагъан студентлени де къуршап чара оьтгережегини гьакъында айтгъанлар. Шонда абитуриентлер учун касбу танглавну гьакъында пайдалы лакъыр болажакъ.


Бизин мухбирибиз.


Авторизация
*
*
Регистрация
*
*
*
Согласны с условиями сайта?
Генерация пароля