Яшларыгъызны хатабалагьлардан къоругъуз!

Тергевлер гёрсетегени йимик, хатабалагьланы кёплюгю гьайдавчуланы тергевсюзлюгюнден, низамсызлыгъындан ва ёл юрюшню къайдаларын сансымайгъанлыкъдан бола.

Тюзюн айтмагъа герек, хатабалагьлар ёлда юрюйгенлени оьрде эсгерилген гесимлени сакъламайгъанлыкъдан да бола. Масала, кёбюсю адамлар, токътагъан машинни алдындан чабып, ёлну къыркъмагъа къарайлар. Натижада солдан яда онгдан гелеген машинни тюбюне тюшюп къалалар.

Болуп турагъан хатабалагьланы алдын алмакъ учун Магьачкъалада сентябр айны 25-нден октябрни 5-ши болгъунча «Пешеход» деген профилактика чаралар оьтгериле.

Бирдагъы бир затны эсгермеге герек. Гьали ёл гесимлени бузса, янгыз гьайдавчулар такъсырланып къалмай, ёлдагъы ёл юрюшню бузгъанлардан да 500 манат къоду алына.

Яшлар булан болагъан хатабалагьлар да кемимей. Бу йылны башындан берли шолай 6 яш оьлген, 46 яш яралангъан.

Анасыны яда атасыны къолундан тутмай юрюйген гиччипавлар да хатабалагьлар болмагъа имканлыкъны артдыра. Уллулар, сизден тилев, яшларыгъызны орамда къаравсуз къоймагъыз. Ойлашып къарагъыз, шолай этсегиз, яшыгъызгъа бир балагь къопмагъа имканлы.

Гьайдавчулагъа да ёлда бек тергевлю болмагъа герек.

Бирдагъы затны эсгерейим, гюз айларда хатабалагьлар айрокъда кёп бола. Неге тюгюл, чалт барагъан машинни бавукъ асфальтны уьстюнде тез токътатмагъа бажарылмай.

Ёлну къыркъып, къарангы вакътиде чыгъагъанлар да ёлугъа. Шолай вакътилерде хатабалагь болма бек имканлы. Сонг да, яшны опурагъына къарангыда ярыкъ берер йимик бир зат тиксе, бек пайдалы болур эди.

Ата-аналар, эгер ёлну ортасында ойнайгъан яшланы гёрсегиз, оланы къырыйындан оьтюп гетмегиз, буварыгъыз, ёлдан арек тайдырыгъыз. Эгер биз барыбыз да бирче иш гёрсек, хатабалагьланы оьлчевюн ва санавун хыйлы кемитме болагъанны унутмагъыз.

Руслан Исмайылов,

ГИБДД-ни старший инспектору.


Авторизация
*
*
Регистрация
*
*
*
Согласны с условиями сайта?
Генерация пароля