ТЫВА РЕСПУБЛИКАНЫ ОЬР САВГЪАТЫ БЕРИЛДИ

     

Жанын къурбан этип батылагъан къызьяшны къутгъаргъан



Къарланюртлу (Хасавюрт район) Рашит Салагьбековну игитлигини гьакъында «Игитликге ер табыла» деген ат булан бизин газетни бетлеринде язылып чыкъды. Охувчуланы эсине салып, ону игитлигини гьа­къында бирдагъы да эсгерейик.



29-нчу июнда Москвадагъы «Ашан» деген уллу сатыв уьйню къуллукъчуларыны бир бёлюгю Москва оьзени янындагъы «Серебрянный Бор» деген ял алагъан ерге бара. Олар шо ерде геч болгъунча ял алалар. Сагьат тогъузлагъа таба коллективден 2 къыз сувгъа юзме тюшелер. Оланы батма башлагъан бирисин сув ягъа­дагъы къутгъарывчулар алып чыгъара. Аридегиси буса батылма башлай. Шону эс этген къарланюртлу къумукъ улан Рашит Салагьбеков, гёлегин де чечип, атылып сувгъа тюше ва чалт юзюп шо къызны янына етише. Етишгени булан ону ягъа­гъа тартма башлай. Ягъагъа чыкъмагъа 20 метрлер къалгъанда, ону гьалы бите ва экевю де батылма аз къала. Рашит ягъадагъылагъа кёмек тилеп къычыра. Кёмекге тюшген экевню бириси де, гьалны гёрюп, тез ягъагъа багъып юзме башлай. Рашит гьалсыз турагъан къызны яшланы бириси Насим Эраназаровгъа тапшура, ол да ону чачларындан тутуп ягъагъа тарта. Къалгъанлар эс тапгъанча, Рашит батыла. Ону къарангылыкъда табып болмай, экинчи гюн водолазлар Москва оьзенден табалар.



Рашит оьлюмден къутгъаргъан Тыва республикадан гелген къыз болгъан, аты да Айкъыз. Шо хабарны эшитгенде, Тыва республиканы башчысы Шолбан Къара-оол 2017-нчи йыл 21-нчи июлдагъы къарары булан Салагьбеков Рашитни (оьлгенден сонг) оьзлени инг де оьр ордени булан савгъатлагъан.



1-нчи октябрде Тыва республиканы делегациясы шо савгъатны Рашитни ата-анасына тапшурмакъ муратда Къарланюртгъа гелди.



–Мен республиканы башчысыны ва халкъыны атындан башлап сизге къайгъырышывубузну билдирме сюемен, – деди делегацияны башчысы Ондар Чимит-Дор­жу. – Гьалиги заманда сизин авлетигиз этген игитлик –уллу иш. Ол оьлежегин ойлашмай, бизин къызны къутгъаргъан. Ол дагъыстанлылагъа хас хасиятны гёрсетген. Тываны халкъы сизин уланы­гъызны игитлигин бек уллу гьюрмет булан эсгере.


–Бизин бугюн Рашитни ата юртуна гелгенибиз янгыз ону ата-анасына савгъатны тапшурмакъ учун тюгюл, – дей Тыва республикадан Пачалыкъ Думадагъы депутаты Мерген Ооржак. – Биз шо игитни оьсдюрген топуракъгъа баш иймеге гелгенбиз. Ол шу топуракъда тувгъан ва ата-анасы булан герти эргиши хасиятларда оьсген.



Ону сёзлерине Тыва республиканы Оьр Хуралыны депутаты Радислав Наважап да къошулду.


Рашит Салагьбековну атасы Мухтаргъа «За вклад в патриотическое воспитание молодежи» деген Агьматхан-Солтанны медалы да тапшурулду.





Суратларда: Тыва Республиканы вакиллерини башчысы Ондар Чимит-Доржу Рашитни ата-анасына къайгъырышывун билдире. Рашитни ата-анасына тапшурулгъан савгъатлар.


Авторизация
*
*
Регистрация
*
*
*
Согласны с условиями сайта?
Генерация пароля