Таш юрекли Ташбийке

Асарда шавхалланы заманы суратлана. Тирменчи Шавлухну къызы Ташбийке, яш чагъында анасын тас этип, атасы булан оьсе. Ону оьзюне чер гелеген улан Темир сюе. Тек буланы сюювюне тез таш салына. Ташбийкени шавхал оьзюню къаласына гючден алып гете. Тек, оьзюню яш йылларына да къарамайлы, Ташбийке къаланы ичинде де оьзюню къатты хасиятын гёрсетмеге бажара ва сюйген уланына амин кюйде къала.

Спектаклде сюювню темасы лап да алда токътагъан деп айтмагъа ярай. Ташбийкени келпетин уста кюйде яратмагъа бажаргъан янгы арагъа чыгъып гелеген Камила Гьажиева ва Темирни келпетине гирип къалгъан Элдар Магьамматов залда олтургъанланы харс урувларын бир нече керен къазандылар. Ондан къайры да, театрны белгили артистлери Б. Осаев, Т. Осаева, Н. Акавов, Ж. Бекеев, Б. Магьамматов, З. Магьамматова ва оьзгелери спектаклдеги оьзлеге тапшурулгъан келпетлени ойнагъан кюю къаравчуланы бек кепине гелди.

Драма асар гьисапда сагьнагъа салмагъа гьазир этилген спектакль пашманлыкъны, зулмучулукъну шавхалланы заманындагъы халкъны ярлы яшавун суратлайгъанын гёрсете. Къаравчулагъа шо якъдан таъсир этмеге болгъан художник Г. Салимгерееваны да аслам къошуму барны айрыча эсгермеге тюшедир. Спектаклде белгили композитор Н. Дагьировну музыкасы къолланды.

Тюзюн айтгъанда, артдагъы вакътиде Къумукъ театрны сагьнасында даим комедия жанр кёп ойналагъанына адамлар уьйренип де битген эди. Бу спектакль буса драма жанргъа гире.

Спектакль тамамлангъан сонг, къаравчулар разилигин билдирип, артистлеге кёп заман харс уруп турдулар.

Б. Оьлмесова.

Суратда: спектаклден гёрюнюш.

Авторизация
*
*
Регистрация
*
*
*
Согласны с условиями сайта?
Генерация пароля