«Таргъу тав» ярмакюде дагъыстан печат къуралланы выставкасы болду

Ярмакюню оьтгеривю булан бирге китап чыгъарыв тармакъгъа тергев бакъдырмакъ, авторлагъа  ва басмаханалагъа талапланы артдырмакъ, авторлукъ ихтиярланы бузагъанланы алдын алмакъ учун гьай этиле.

Китап ярмакюде Дагъыстан китап басмаханасы, «Мавраевъ», «Эпоха» деген китаплар чыгъарагъан уьйлер, ярмакюню къонакълары гьисапда буса Россияны башгъа регионларындан гелген китапханалар ортакъчылыкъ эте эди. Китапны байрамында белгили шаирлер, язывчулар булан яратывчулукъ ёлугъувлар, адабият ахшамлар, пикру алышдырывлар, аслусу, охувчулар булан ёлугъувлар оьтгерилди.

Ярмакю оьтгерилеген гюнлерде оьр охув ожакъланы студентлери, школаланы охувчу яшлары  ва дарс беривчюлер ортакъчылыкъ этди.

Октябр айны 11-нде Дагъыстан Республикада чы­гъагъан газетлеге ва журналлагъа 2015-нчи йылгъа язылыв кампаниясыны выставкасы да юрюлдю. Выставканы вакътисинде Дагъыстан печат къураллагъа 2015-нчи йылгъа язылыв да юрюле эди. Тек бу гезик де выставка журналистлени, газет къуллукъчуланы ва шаирлени арасында оьтгерилеген йимик болду.  Неге тюгюл де, газетлеге тергев берегенлер аз гелди. Бизин «Ёлдаш» газетге  язылгъанлардан да бир адам тюгюл болмады.

Газетлеге язылыв багьалар артгъандан берли язылывну санаву да тёбенлешген. Выставкада буса газетлеге тёбен багьасындан язылма имканлыкъ да бар эди. Газетлеге язылагъанлар болмаса да, выставкагъа салынгъан газетлени ва газетни юбилейине чыкъгъан китапланы ва китапчаланы выставканы къонакълары оьзлер булан алып гетди.

Выставкагъа гелгенлени арасында яшларыны яшларын ана тилине уьйретмек учун къумукъ тилде яшлар учун язылгъан китап яда журнал  излейген уллана да ёлукъду. Огъар бизин яныбыздан «Ёлдаш» газетни «Яшланы дюньясы» деген сагьифасындан ва «Къарчыгъа» журнал булан пайдаланмакъны таклиф этдик. Балики, милли печат къураллар булан бир нече адамны таныш этме яда милли ругьун уятма бажарылгъан буса, печат къуралланы выставкасы негьакъ оьтгерилмеген деп айтмагъа ярайдыр.  

 

 

П. БЕКЕЕВА.

Авторизация
*
*
Регистрация
*
*
*
Согласны с условиями сайта?
Генерация пароля