Таргъу школада шатлы жыйын

     


Гетген жумада Таргъу школада Дагъыстанны халкъ шаири, «Къарчыгъа» журналны редактору, Дагъыстанны язывчуларыны къумукъ секциясыны ёлбашчысы Шейит-Ханум Алишеваны 70 йыллыкъ юбилейине багъышлангъан алай арив мукъаятлы кюйде Иса Агьматов язгъан сценарийге гёре гьазирленген шатлы жыйын болду.



Шонда гёрмекли алим ва жамият чалышывчу Салав Алиев, гьаракатчы жамият чалышывчу Вагьит Вагьитов, Дагъыстанны ат къазангъан врачы Аминат Жамалутдинова ва оьзгелер ортакъчылыкъ этдилер. Онда сёйлегенлер Шейит-Ханумну зор гючлю ва терен маъналы шиърулардан къайры, олар адамны ойгъа салагъан, сесгендиреген, уятагъан бек чебер, герти поэзия экенни айтдылар, ону яратывчулугъуна кёп уллу багьа берилди.



Школаны безендирилген залында юрюлген жыйынны Таргъу школаны завучу, «Заманлар гете, халкъ гетмес» деген телепрограмманы редактору Иса Агьматов ачды ва Шейит-Ханумну юбилейи булан къутлады.



Залда школада йырлав дарсланы юрютеген пагьмулу муаллим Айида Магьамматова фортопьянода адам ял табагъан макъамны согъа, сагьнагъа буса 3 охувчу къыз чыгъып, уста кюйде орус, къумукъ, ингилис тиллерде Ше­йит-Ханумну шиъруларын охуй.



Бу ахшамны аралашдырып, Иса Агьматов булан бирге халкъны тергевюн тартагъан кюйде ана тиллерден дарслар юрютеген муаллимлер Дина Дагьирова, Патимат Батыраева башындан аягъына ерли юрютдюлер. Сагьнада Шейит-Ханумгъа багъышлангъан «Заманлар гете, халкъ гетмес» деген берилишден бир-бир гесеклер гёрсетилип турду. Бир тигим чакъы къызлар, уланлар тамаша, тюрлю тюслерде опуракълар да гийип, биринден-бири чартлатып, чебер кюйде шаирни шиъруларын охуйгъанда, залда олтургъанлар шып болуп тынгладылар.



Шо ахшам бизин ругьландыргъан жагьил муаллим къатынгишилени хору болду. Олар барысы да бир тюсде опуракълар да гийип, башына бырынгъылыкъны эсибизге салагъан тастарлар да чатып, англы тавушлары булан хор этип, Шейит-Ханумну сёзлерине гёре кимге де таъсир этеген кюйде бек арив йырладылар.



Озокъда, йырлар, шиърулар булан сёйлевлер де болду. Таргъу школаны директору Камалутдин Межитов бары да гелген къонакълагъа разилигин билдире туруп, Таргъу юртлу, пагьмулу шаир Шейит-Ханум булан бары халкъ бек оьк­тем болагъанны айтды.



Бу ахшам танывлу алим, жамият чалышывчу Салав Алиевни сёйлевю айрыча къужурлу ва маъналы чалынды.



–Аллагь: «Мен инсанлагъа яхшылыкъ себелеме сюйсем, башлап шону аламатын гёрсетермен», – деген. Таргъугъа гьалиден минг йыллар алда кёп Ше­йит-Ханумлар гелген болгъан. Биз ону билмей тургъанбыз–къыркъ къызлар. Оьзюню Ватанына йыртгъыч душманлар чапгъанда, эренлери битип, дагъы адамы къалмагъанда, олагъа къаршы шо 40 къыз чыгъа. Душманлагъа къаршы ябушма гючю чатмагъанда, олар Аллагьутаалагъа тизлеринден туруп, Аллагьизен, бизин ташгъа айландыр деп тилеген. Бу – бырынгъы Таргъу юртда гёрсетген биринчи аламаты.



Экинчиси, Таргъудан чыкъгъан Вали Кули Дагъыстанлы ари якълагъа, Индиягъа чыгъып гетип, биргине-бир язгъан китабы бар. Шону аты – «Шаирлени баву». Шонда ол: «Мен сюювмен, оьлмежекмен бир де мен», – деп яза. Шейит-Ханумну бир нече йыллар алда язгъан «Гьасирет-наме» деген китабы бар. Шону 3 керен къайтарып айтсакъ, ону тюп маънасы нюр болуп юрегигизге тамажакъ. Таза аналыкъ болма гьасирет наме, таза къызардашлыкъ, саламатлыкъ, ватанчылыкъ болма гьасирет наме. Бир китапны ичинде бары зат бар. Шолай аты булангъы дагъы китап чыкъмажакъ. Гьасирет намени заманында яшайгъан Шейит-Ханумгъа Аллагь савлукъ берсин.



Шо гюн Жалав Бекеев ва Зугьра Межитова шаирни сёзлерине гёре язылгъан «Булакъ башда» деген йыр йырлагъан сонг, ахшамны гюлю дагъы да бек ачылды. Къонакълар юлдуз йимик къурулгъан столланы артында хыйлы заман сыр чечип, шайлы гёнгюн ачдылар.



СУРАТДА: шатлы жыйындан гёрюнюш.



Авторизация
*
*
Регистрация
*
*
*
Согласны с условиями сайта?
Генерация пароля