Талаплар ва борчлар


Дагъыстан – Россияда социал-экономика оьсювде лап да артда къалагъан бой. Шо саялы гележекни гьисапгъа алып, бир къадар чаралар гёрюлегени тергевню тартмай болмай.



Артдагъы гюнлерде Магьачкъалада Техника университетни жыйынлар залында оьтгерилген генглешген жыйын да шогъар шагьатлыкъ эте. Онда Дагъыстан Республиканы бары да минис­терликлерини, тармакъларыны ва муниципал къурулувларыны, далапчылыкъ булан машгъул болагъан тайпаланы ортакъчылыкъ этивю булан «Дагъыстанны социал-экономика якъдан оьсдюрювню 2035-нчи йылгъа ерли стратегиясы» деген масъалагъа байлавлу Дагъыстанны энергетика ва промышленност министерлигини сиптечилиги булан гьакълашыв оьтгерилди.



Генгешни ачылывунда би­ринчи сёз Дагъыстанны Гьукуматыны Председателини заместители Гьажимагьаммат Гьюсейновгъа берилди.



– Гьар къайсы пачалыкъда да энергия гючлерсиз экономиканы бир тармагъын да оьсдюрмеге бажарылмай, – деп узатды ол оьзюню сёзюн. – Шо тармакъны оьсдюрмек учун бизин республикабызда да бар имканлыкълар толу кюйде пайдаландырылмайгъаны гьакъда ойлашма ва тийишли чаралар гёрмеге герек.



Ондан сонг Дагъыстанны энергетика ва промышленност министерлигини башчысы Са­йитпаша Умаханов генгешни ортакъчыларына гюнлюк низамгъа байлавлу оьзтёрече баянлыкъ берди.



Генгешни ортакъчылары беш бёлюкге бёлюндю ва арагъа салынгъан масъалагъа байлавлу пикру алышдырывлар оьтгерилди. Дагъыстанны умуми ич продукциясын болдурувда энергетика ва промышленност тармакъны къошуму разилик тувдурмай. Неге десегиз, шо санавгъа айландыргъанда 3, 5 процент болуп токътай. Тармакъда ишлейгенлени санаву да шогъар гёре 9 мингден кёп тюгюл. Не этмеге герек?



Биринчилей, Дагъыстангъа да оьз пайдасы учун ерли маъданланы: ягъарлыкъ газны, къаранапны имканлыкъларын пайдаландырывгъа гёчмеге тюше.



Кёп йыллыкъ проектлени болжалларыны дазуларындан чыкъмакъ да парз. Неге десегиз, бугюн Дагъыстанда ерли имканлыкъланы яшавгъа чыгъарывда бар имканлыкъланы 10 проценти тюгюл къолланмай.



Артдагъы он йылны ичинде ерли имканлыкълар осал пайдаландырылагъаны саялы, къоллавчуланы талаплары 1,6 керен артып тура. Сёзден ишге гёчювню масъаласы агьамиятлы деген къарарда борчлар белгиленди.



Авторизация
*
*
Регистрация
*
*
*
Согласны с условиями сайта?
Генерация пароля