Наркотиклени яйылывуну алдын алывгъа багъышланды

  


 
Торайып гелеген яш наслуну вакиллерин наркотиклерден ва гьакъылын тунукълашдырып, савлу­гъун бузагъан гьар тюрлю маддаланы къоллавдан къоруп сакълав йимик масъала ­оьзюню агьамиятлыгъын бир де тас этмей. Тувулунгъан шо гьалны гьисапгъа алып, ДР-ни яшёрюмлени ишлерине къарайгъан министерлиги сиптечилик гёрсетип, Къарабудагъгент районну администрациясыны якълаву булан жагьиллени арасында наркотиклени яйылывуну алдын алывгъа байлавлу гьаракатгъа  къуршалгъанланы биринчи рес­публика слёту оьтгерилди.



Эсгерилген районну Манасгент юртуну ювугъунда ерлешген «Лотос» деген савлугъун бек­лешдиреген спорт комплексде сентябр айны 15-нден 17-сине ерли юрюлген шо слётну ишинде ортакъчылыкъ этген яшёрюмлени ва жагьил адамланы ону барышында яшавгъа чыгъарылгъан гьаракатлар айрыча тергевюн тартгъаны гьакъда айтмагъа бажарыла.



Къарабудагъгент районну администрациясыны яшавлукъ масъалалагъа къарайгъан управлениесини ёлбашчысы Гюлжанат Темирова бизге билдиргени йимик, слётда бизин республиканы гьар тюрлю районларындан гелген оьр ва орта хас охув ожакъларыны студентлери, жагьиллени жамият бирлешивлерини вакиллери ортакъчылыкъ этди. ДР-ни яшёрюмлени ишлерине къарайгъан министерлигини, олай да Къарабудагъгент районну жагьиллерини парламентини вакиллери слётну оьтгеривге жавап­лы янашып, айрыча жагьлыкъ гёрсетди.



Слётну биринчи  гюнюнде яшёрюмлеге «Къарабудагъ» деген окъ-жая атагъанланы клубуну ёлбашчысы Болат Гьажиев булан бирче мердешли шо савут булан сынав атышывлар оьтгермеге имканлыкъ берилди. Шондан къайры да, слётну сиптечилери жагьиллени атарбаны ерлемеге,  балыкъ тутмагъа да уьйретди. Олар учун наркотиклени яйылывуну алдын алывгъа багъышлангъан хас чаралар да юрюлдю.  Артындагъы гюн шатлыкъны шартларында ачылып, слёт хас кюйде оьзюню ишин башлады.



ДР-ни яшёрюмлени ишлерине къарайгъан министерлигини бёлюгюню ёлбашчысы Юнус Гьюсейнов, Къарабудагъгент ра­йонну башчысыны биринчи заместители Агьмат Гьажиев жыйылгъанлагъа, биринден-бири алып дегенлей, наркотиклер адамны савлугъуна некъадар зарал гелтирегени гьакъда жыйылгъанлагъа таъсирли кюйде лакъыр этди.



Шону булан бирге, Г. Темирова оьзлеге пайдалы болар йимик ял алмакъ учун нечик шартлар яратылгъаны гьакъда айтды. Къарабудагъгент районну туризмни оьсдюрювдеги  имканлыкълары гьакъда ол оьзюню сёйлевюнде айрыча эсгерди.



Оьтгерилген слётну ахырында Россияны ич ишлер министерлигини наркотиклени яйылывуна къарайгъан управлениесини Дагъыстандагъы бёлюгюню ёлбашчысы Надежда Сейфудинова  адамны савлугъуна зараллы маддаланы жагьил адамланы арасында  къоллавну алдын алмакъ учун юрюлеген гьаракатны гьакъында жыйылгъанлагъа айтды. Шондан сонг яшёрюмлер эки гюпге бёлюнюп, денгиз ягъада топ ойнады. Олар Къарабудагъгентдеги яшланы ва яшёрюмлерини спорт школасына къуршалгъанлар юрютген тренировкагъа къарады.  Шо тренировканы барышында  яш спортчулар жыйылгъанлагъа оьзлени усталыгъыны даражасын толу кюйде гёрсетмеге болду. ДР-ни яшёрюмлени ишлерине къарайгъан министрини замес­тители Камил   Сайитов юртлу яшланы бажарывлугъуна оьр къыймат берди ва олагъа спортда гележекде дагъы да уьстюнлюк­лер ёрады.



Слётну сиптечилери бизге билдирген йимик, «Лотос» деген савлугъун беклешдиреген спорт комплексни ёлбашчысы Магьамматтагьир Эскендеров ва яшланы «Аист» деген ял алыв лагерини ёлбашчысы Рая Аминова ону ортакъчыларына онгайлы шартлар болдурмакъ учун шо гюнлерде айрыча къаст этди.



СУРАТДА: слётну ортакъчылары.

Авторизация
*
*
Регистрация
*
*
*
Согласны с условиями сайта?
Генерация пароля