Наркоманиягъа къаршы гьаракат

Ноябр айны 15-нде Къызылюртда республикада лап да агьамиятлы деп гьисапланагъан наркоманияны алдын алывгъа багъышлангъан масъалагъа гёре «дёгерек стол» оьтгерилди. Шонда «Кавказ» деген халкъара бирлешивю, Дагъыстанны яшёрюмлерини ишине къарайгъан министерлиги булан бирче, Къызылюртну террорчулукъгъа къаршы иш гёреген комиссиясы да якълап гьазирлеген эдилер.

Шо агьвалатда Къызылюрт шагьар администрацияны башчысыны заместители Насрулла Гьасанбеков чыгъып, гиришив сёзюн айтды.

–Бизин шагьарда жагьил, торайып гелеген наслу ругь-къылыкъ яндан оьссюн учун бары да шартлар яратылгъан. Спорт школалар, яшланы яратывчулугъуну школасы, гиччипавланы инчесаният школасы къасткъылып иш гёре.   

Оланы шо ожакъларда къошум гьисапда билим алмагъа, оьзлени бары якъдан пагьмуларын ачмагъа имканлыкълары бар. Артдагъы заманларда бизин шагьар яшёрюмлени ругь, къылыкъ, патриот якъдан тарбиялап, оьр натижалагъа етишген,–деп билдирди Н. Гьасанбеков ва жыйылгъанлагъа мекенли кюйде ишин юрютмекни ёрады.

Къызылюртдагъы билим берив бёлюкню методисти Лайла Гьажаматова яш наслуну ва оланы ата-аналары булан билим берив ожакъларда юрютеген пайдалы ишлерини гьакъында айтды. Оланы гьаракаты булан масъаланы гьакъында маълумат берип, суратлардан безендирилген буклет чыгъаргъанлар.

Шонда Къызылюртдагъы билим берив бёлюкню начальниги Абдулкъадыр Магьамматов оьзюню сёйлевюнде яшланы яшавуна, савлугъуна уллу къоркъунч­лукъ барны эсгерди. Ол айтгъан кюйде, шо масъаланы чечмек учун бары да халкъ къуршалып иш юрютме тарыкъ.

Террорчулукъгъа къаршы иш гёреген комиссияны специалисти Камил Мусаев наркоманияны алдын алыв ишлени натижасын чыгъара туруп, 2 номерли школаны вакиллери Тагьир Абдурагьмановну ва Рамина Ибрагьимованы пайдалы сынавуну гьакъында айтды. Олар бу йыл наркотиклеге къаршы Бютюнроссия конкурсда оьзлени проектлери булан ортакъчылыкъ этип, РФ-ни МВД-сини башчысы Виктор Колокольцевни атындан грамоталар къазангъанлар.

Авторизация
*
*
Регистрация
*
*
*
Согласны с условиями сайта?
Генерация пароля