КЪЫЗЫЛЮРТ – УЬЧЮНЧЮ ЕРДЕ

 

Россияны МЧС-ини Дагъыстандагъы баш управлениесини начальнигини орунбасары Олег Халилов оьтген йыл республикада 7 къувунлу гьал болгъанны айтды. Шонда 84 адамгъа зарал болгъан ва 30 адам оьлген. Буса да, санавлар булан айтса, къувунлу гьаллар алдагъы йыллардан эсе 36 процентге аз болгъан. Шолай, от тюшювлер де 3 процентге кемиген. Оьтген йылда республикада от тюшювге къаршы иш гёреген 13 гёнгюллю бёлюк къурулгъан ва 526 гёнгюллю дружина бар, шолар 83 юртгъа къарай.

Къувунлу гьалны къабул этмек ва тезликде тарыкъ адамлагъа билдирмек учун 44 муниципал къурулувда 44 диспетчер къуллукъ ачылгъан.

Ишни къурумлу этмек учун гьар йыл муниципал къурулувланы арасында адамланы аманлыгъын сакълавгъа багъышлангъан конкурс оьтгериле. 2014-нчю йылны гьасиллерине гёре районланы арасында 1-нчи ерде  – Лак, 2-нчи ерде – Сергъокъала ва 3-нчю ерде – Къазбек районлар, шагьарланы арасында биринчи ерде – Каспийск, экинчи – Магьачкъала ва уьчюнчю ерде буса Къызылюрт шагьар гьисаплана.

Оьтген жума Къызылюрт шагьар администрацияны башчысыны орунбасары Маккагьажи Идрисов къутлав кагъызны ва савгъатны ерли бёлюкге тапшурду.

 

 

Гебек КЪОНАКЪБИЕВ.

Суратда: Маккагьажи Идрисов.

Авторизация
*
*
Регистрация
*
*
*
Согласны с условиями сайта?
Генерация пароля