Къаягентде болгъан дин масъалалагъа байлавлу ёлугъув

Къаягент районну башчысыны жамиятны аманлыгъына къарайгъан заместители Жалил Алациев районну социал-экономика ва райондагъы динни гьалы гьакъда айтды. Ол эсгерген кюйде, Къаягент райондагъы гьал яман тюгюл, мекенли. Амма район террор ишлер гючленген Дербент, Табасаран районлар, Избербаш шагьар булан дазулангъаны ойлашма борчлу эте. Шо саялы Ж.Алациев сакъ болмакъны ва террор ишлеге къаршылыкъ билдирмекни таклиф этди. Ол яшёрюмлени арасында радикал идеологияны алдын алмакъгъа тергев бермеге чакъырды.

Къаягент районлуланы Абас гьажи Гьюсейнов юрт имамланы арасында юрюлеген ишлени гьакъында гьисап берди:

–Районда мен ишлейгеним бир йылдан къолай бола. Шо заманны ичинде биз муниципал къурумлар булангъы аралыкъны, ерли оьз ишин оьзлер юрютеген къурумлар ва жамаатлар булангъы ишни къолайлашдыргъанбыз. Школаланы директорлары булан агьамиятлы масъалалагъа байлавлу иш юрютебиз. Шо ишни гючлендирежекбиз ва узатажакъбыз, – деди ол.

Республиканы дин масъалалагъа къарайгъан комитети республиканы муниципалитетлери булангъы ишни бирликде чечме къаст этежегин Мурат Шафиев эсгерди. Ол айтгъан кюйде, республиканы дин масъалалагъа къарайгъан къуллукъчулары тармакъ планлагъа гёре ишни юрюте ва ерлеге барып чаралар оьтгере. Шолай, Къыбла, Темиркъазыкъ ва уьч Тав округда террорчулукъгъа ва экстремизмге къаршы яшёрюмлени ругь-къылыкъ ва патриот якъдан тарбиялав масъалалагъа байлавлу республика конференциялар оьтгерген.

–Бу йылны дёртюнчю кварталында Дагъыстанны дин масъалалагъа къарайгъан комитети Орта территория округунда шолай чара оьтгерме гёз алгъа тутгъан, – деди ол.

Дагъыстанны дин масъалалагъа къарайгъан комитетини консультанты Давут Тумалаев оьзюню сёйлевюн муниципал гьакимликни ва дин идараланы арасындагъы байлавлукъгъа багъышлады. Ол имамлар жамаат булан ишлейгенни, шо саялы ерли гьакимлик булан школаланы директорлары булан, участка полицейскийлер булан межитге намаз къылма гелегенлер булан аралыкъны яхшылашдырмакъны гьакъында эсгерди.

Къаягент районну уголовный ишлеге къарайгъан начальниги Тофик Алиев районда 88 муниципалитет гьисапгъа алынгъанны, 22 адам Сирияда юрюлеген дав агьвалатлагъа къуршалгъанны гьа­къында айтды. Яшланы ата-анасына багъып айта туруп, ол яшларына тергев бермекни, олар Интернетде не этегенни билме герекни гьакъында айтды.

Ёлугъувну жамын чыгъара туруп, район башчыны заместители Жалил Алациев гелгенлеге баракалла билдирди. Булай ёлугъувланы школаларда, межитлерде заман-заман оьтгере турмакъны гьакъында айтды.

 

А. Гьамзаев.

Авторизация
*
*
Регистрация
*
*
*
Согласны с условиями сайта?
Генерация пароля