«Дагпродэкспо-2013»

Шогъар байлавлу болуп октябр айны 8-нде «Дагестанская правда» газетни жыйынлар залында хас прес-конференция оьтгерилди.
Прес-конференцияда эсгерилген выставка центрны директору Магьаммат Сариуланов, Дагъыстанны юрт хозяйство ва сурсат министрини заместители Жамалутдин Магьамматов ва шолай да Дагъыстанны сабанчы-фермер хозяйстволарыны бирлешивюню иш юрютювчю директору Райисат Алиева ёлдашлар выставканы оьтгеривге байлавлу гёрюлеген гьазирликни барышы гьакъда толу кюйде баянлыкъ берди.
– Дагъыстанны Президенти Рамазан Абдулатиповну сиптеси булан къурулгъан ППП-ни (приоритетние президентские программы) ичинде «Дагъыстанны агропромышленный тармагъыны асувлулугъу учун» деген хас программаны талаплары – бизин алдыбызгъа салынгъан сыйлы ва жаваплы борч, – деди Жамалутдин Уллубиевич. – Дагъыстанда «Дагпродэкспо-2013» бу йыл он биринчи гезик оьтгериле. Демек, бизин республикабызда базарлагъа сан яны акъсамайгъан продукция чыгъарывгъа тергев гючлене.
Юрт хозяйство министрни заместителини англатывуна гёре, къоллавчуланы талапларын гьисапгъа алып, шулай ярмакю-выставкалардан таба юрт хозяйство малланы ва къуллукъланы малим этив пайдалы болажакъ.
Магьаммат Сариуланов билдирген кююнде, выставкада аслу гьалда 6 аслу бёлюк ишлежек. Шолайлыкъда, алывчуланы алдына Россияны гьар тюрлю регионларындан гелтирилген 100-ден де кёп предприятиелени ашамлыкъ маллары, соклар, машинлер, ишлетив промышленносту ва шолай да ресторанлар, кафелер учун тарыкълы ясандырыв къураллар сатылажакъ.
Шону булан бирче ярмакю-выставкада дагъыстанлы сабанчы-фермер хозяйстволарда болдурулагъан продукциясы да сатывгъа чыгъарылажакъ.
Выставканы программасында, гёз алгъа тутулгъан кюйде, хас маданият программасы да гёрсетилежек, «дёгерек столлар», генгешлер, конференциялар ва малим этивлер (презентация) болажакъ.

Къ. Къараев.

Количество показов: 555

11.10.2013 08:36

Возврат к списку