Биринчи яш тувду

Центрда ишлейген медицина къуллукъчулар тувгъан къызны чыгъарагъан гюн яхшы гьазирлик гёрдюлер. ­Огъар савгъатлар бердилер ва аналыкъ сертификатны яшны анасына тапшурдулар.

 

Тувгъан къызны чыгъарагъан гюн гиччирек байрам болду. Ону алма гелген дос-къардашы бёлюк безендирилген кюйню гёрюп сююндюлер.

– Мен бугюнню бир де унутмажакъман. Шу янгы центрда мени тувгъан яшыма этген абур саялы бары да медицина къуллукъчулагъа баракалламны билдиремен, – деди къызны анасы Хеди Алиева.

Темиркъазыкъ Кавказда шулай уллу перинатальный центр биринчилей Хасав­юртда ачылгъан. Муна бугюн центрны яшавунда эсде къалардай агьвалат болду. Тувгъан биринчи къызны чыгъардылар. Яш тапма гелген къатынлагъа центрда бары да имканлыкълар яратылгъан.

Центрны дёрт къабатлы уьч корпусу ва 13 бёлюгю бар. Бу центрны къурмакъ учун 700 миллион манат чыкъгъан. Ишлейген адамланы санаву 400-ге чыгъа.

– Центрда яш тапма гелген бары да къатынлагъа тергев ва къарав яхшы къурулгъан.

Патология, анестезиология-реанимация бёлюклер янгы техника ясандырывлар булан таъмин этилген.

Бир сменде 100 къатынны къабул этип болагъан поликлиникабыз да бар. Инаныгъыз, булай центр Хасавюрт шагьарда кёпден берли къурулма герек эди. Неге тюгюл де, Новолак, Гумбет, Къазбек ва Хасавюрт районлардан яш тапма кёп къатынлар гелелер, – деди центрны баш врачыны борчларын заманлыкъгъа кютеген Алжанат Багьавутдиновна Гьажиева.

 

Измулла ГЬАЖИЕВ.

Автор чыгъаргъан сурат.




Авторизация
*
*
Регистрация
*
*
*
Согласны с условиями сайта?
Генерация пароля