Асувлу иш юрюле

Шо ёлугъувну барышында маданият идараны къуллукъчулары 2013-нчю йылда юрютген гьаракатны гьасиллери малим этилди. Олай да, гележекге гёз алгъа тутулгъан чараланы гьакъында баянлыкъ берилди.

– Китапханалар алдын берли де халкъны билим алывгъа, гьакъылгъа тартагъан ожакъланы лап аслулары гьисапланып гелген. Бугюнлерде де шо идараланы ишини агьамиятлыгъы кемимей.

Буссагьатгъы вакътиде пачалыкъ ва гьакимлик къурумланы ягъындан китапханалагъа, таман чакъы даражада болмаса да, тергев артгъан демеге ярай, – деп эсгерди оьзюню сёйлевюнде Паша Телекъавов.

Ону сёзлерине гёре, маълумат береген техника къураллар нечакъы оьссе де, китап йимик адамны гьа­къылын артдырмагъа болагъан гьеч бир зат да ёкъ экенин милли китапхананы бары да къуллукъчулары англай ва иш юрютювню гьар тюрлю яратывчулукъ къайдаларын къоллап, оьзлени касбу борчларына жаваплы янашып, жагьил ва яш чагъындагъы адамланы китапханагъа къуршамакъны къастын эте.

– Оьтген йыл, умуми кюйде алгъанда, китапхананы къуллукъчулары учун бек маъналы болду, – деп узатды ол оьзю­ню сёйлевюн. – Дагъыстанны халкъ шаири Расул Гьамзатов тувгъанлы 90 йыл битегенликни белгилев инг аслу, уллу агьамияты булангъы маданият агьвалат болуп токътады. Уллу шаирни юбилейин белгилевню оьлчевюнде адабият ахшамлар, шаирни асарларын чебер къайдада охуйгъанланы арасында къаравлар, китап выставкалар йимик чаралар оьтгерилди.

Къурбан Омаров эсгергени йимик, оьтген йылда китапхананы къуллукъларындан 25 мингден де кёп адам пайдалангъан. Оланы къолуна 600 мингден де артыкъ тюрлю китап берилген. Маълумат береген техника къуралланы асувлу пайдаландырывну натижасында да охувчуланы талапларын кютювню сан янын артдырмагъа бажарылгъан.

– Оьтген йылны узагъында савлай республиканы жамиятыны тергевюн тартагъан кёп тюрлю чаралар оьтгерилди. «Тарки-Тау – 2013» деген китап ярмакю шоланы арасында инг гёрмеклиси болуп токътады. Мердешленип къалгъан кюйде, китапхана оьзге къурумлар ва идаралар булан бирликде кёп тюрлю чаралар оьтгере. Шоланы оьтгеривню вакътисине гьар тюрлю китап выставкалар онгарыла. Шо гьаракат да янгыз китапханагъа охувчуланы къуршавгъа бакъдырылгъан, – деп билдирди Къурбан Омаров.

2014-нчю йыл уьлкени оьлчевюнде Маданиятны йылы белгиленегенлик гьалиге ерли къолланмай тура­гъан имканлыкълагъа ёл ачажагъына инамлыкъ бар.

Насрулла Байболатов.

Авторизация
*
*
Регистрация
*
*
*
Согласны с условиями сайта?
Генерация пароля