«Алтын жижек»



   Артдагъы гюнлерде А-П. Салаватовну атындагъы Къумукъ музыкалы-драма театрда шулай аты булан яшлар учун спектакль гёрсетилди. Режиссёр Завур Алиев орус ёммакъгъа гёре салгъан бу спектаклни  яш къаравчулар уллу иштагьлыкъ булан къабул этди.

 


Гьиллачы Тюлкю Бёрюге къарт Абайны ва Атайны Ряба деген тавугъу къозлагъан алтын йымырткъаны алып, «таза кюйде» бай болайыкъ деп таклиф эте.



– Биз шо алтын йымырткъадан алтын жижек чыгъарарбыз. Жижек уллу болуп, тавукъгъа айланыр. Шо тавукъ гьар гюн алтын йымырткъа къозлар. Биз буса Абайны да, Атайны да уьюн аларбыз, «таза кюйде» яшав къуруп, бай болуп яшарбыз, – дей Тюлкю.



Бёрю рази бола. Бёрюню ролюн Дагъыстанны ат къазангъан артисти Темирлан Умаев уста кюйде ойнай. Бёрю Тюлкюню таклифине рази болса да, йымырткъаны урлама да, уьстюнде олтуруп жижек чыгъарма да оьзюне тюше. Жижек чыкъгъанда Бёрю ону бек сююп къала, аш-сув бере, гьайын эте, аяп сакълай.



Тек бу ерде жижек гюн сайын оьсюп уллу болгъанда, гьиллачылар о хораз экенни англай. Оьзлеге алтын йымырткъадан пайда ёкъну биле. Жижекни ролюн актёр Элдар Магьамматов ойнай. Гьиллачы Тюлкю оьзюню умутларын алышдыра. Тюлкюню ролюн Гюлжанат Жалилова ойнай.



Тюлкю хоразны ашатып, семиртип, уллу болгъанда ашама сюе. Бёрю буса оьсюп уллу бола барагъан хоразны къутгъара. Ону Абайгъа да, Атайгъа да къайтара. Яш къаравчуланы бу ерде харс урагъаны, сююнегени негер де тиймейми?! Бёрю буса абзар итни къуллу­гъун кютемен деп Абайны да, Атайны да янында къалгъанда, яшлар бирден-бир сююндюлер.



Яшлар учун спектакллер Къумукъ театрыбызда сийрек болагъанны гёз алгъа тутуп айтсакъ, бу спектакль – яш режиссёр Завур Алиевни яшланы сююндюрме бажаргъан айрыча пайдалы къошуму.


 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля