Аэропорт гелеген айда ишлемеге башлажакъ

Ону барышында Т. Буганов билдиргени йимик, Магьачкъаладагъы аэропорт декабр айны 1-ден тутуп оьзюню ишин янгыдан башлажакъ деп гёз алгъа тутула. Самолётлар учагъан ва къонагъан ёлну ярашдырыв  токътащдырылгъан болжалдан артда  башлангъанлыкъ аэропортну токъташдырылгъан заманында  ачылма­гъангъа аслу себеп болуп токътагъан. Демек, шо ишлер бу йыл гьаж къылмагъа барагъанлар барысы да гетген сонг  юрюлген. Сонг да, янгурлар кёп явагъангъа гёре , бир нече гюн самолётлар учагъан ва къонагъан ёлгъа асфальт, олай да бетон тутув ишлени токътатмагъа тюшген. 

– Республика оьлчевде чыгъарылагъан маълумат къуралларыны мухбирлери булан оьтгерилген шо ёлу­гъувда М. Ражабов эсгергени йимик, аэропортну самолётлар учагъан ва къонагъан ёлун янгыртыв-ярашдырывгъа байлавлу «Мостоотряд-99» деген къурум юрютеген ишлер ноябр айны 20-нда тамамланажакъ деп гёз алгъа тутула.

– Аэропортну  ярашдырывгъа ва янгыртывгъа байлавлу ишлер халкъара даражада токъташдырылгъан къайдаларда Францияда, Финляндияда, Германияда чыгъарылгъан оьр сан янлы къурулуш материалланы, олай да гьалиги шартлагъа жавап береген техниканы  къоллав булан  юрюле. Бугюнлеге ерли самолётлар учагъан ва къонагъан  ёлгъа 100 минг тондан да артыкъ асфальт, олай да бетон тутулгъан.  Янгыртылгъан сонг, самолётлар учагъан ва къонагъан ёлну узунлугъу 2 чакъырым 640 метрге, генг­лиги де 45 метрге етишежек,– деди ол. 

Прес-конференцияда белгили болгъаны йимик, самолётлар учагъан ва къонагъан ёлун  янгыртывдан къайры да, аэропортну бинасы толу кюйде  ярашдырылажакъ. Шо ишлер 2015-нчи йылда башланажакъ. Аэропортну янгыртыв-ярашдырыв ишлер булан бирге онда ишлейген касбучуланы касбусун камиллешдиривге де тергев бакъдырылажакъ.

 

 

 

Н. БАЙБОЛАТОВ.

СУРАТДА: прес-конференцияны ортакъчылары.

Авторизация
*
*
Регистрация
*
*
*
Согласны с условиями сайта?
Генерация пароля