Абургъа лайыкълылар

      

Тюнегюн, октябр айны 5-нде, савлай уьлкеде муаллимлени гюню белгиленди. Гьар юртда ва шагьарда оьтгерилген шатлыкъ жыйынларда яш наслуну охутувдагъы ва тарбиялавдагъы иши саялы абургъа-сыйгъа лайыкълы муаллимлик касбуну есилерине байрам булан къутлап алгъыш этилди.



Шо да негьакъ тюгюл. Оьзюню бир де агъымын токътатмайгъан заман булан бирче адамланы яшавгъа бакъгъан якъдагъы къаравлары, оланы хасиятлары алышынса да, муаллимлени гьаракаты оьзюню агьамиятлыгъын бир де тас этмей. Алдын йимик гьали де муаллимлер торайып гелеген яш наслуну вакиллерине терен билим бермек, оларда арты битмейген хазнагъа, илмугъа элтеген ёлланы генглешдирмек, оланы гьарисини къылыгъын, хасият битимин билип, айрыча мекенли иш юрюте. Алдында токътагъан шо асил муратгъа етишмек учун муаллимлеге айрыча гьазирлик, хыйлы ахтарыв юрютмеге, тенгсиз четим ишге тюшюнюп, ону сырларын ачып бажармагъа тюше.



Озокъда, артдагъы вакътилерде билим берив тармакъгъа пачалыкъны янындан тергев этилмей къалып тура деп айтмагъа бажарылмай. Тек не этерсен, бугюнлерде билим берив тармакъда яшавгъа чыгъарылагъан алмашынывлар, биз барыбыз да гёрюп турагъаныбыз йимик, гёзленеген, умут этилеген кюйде натижа бермей. Шо гьакъда гележекде лакъыр этмеге къоюп, гьали энни касбу байрамы белгиленеген гюн муаллимлени атына айтылгъан къутлав сёзлеге биз де къошулмагъа сюебиз.



Шону булан бирге, савлай жамиятны ва пачалыкъны талайлы гележегин болдурагъан, яш наслуну тюз ёлгъа салмагъа белсенген муаллимлер четимликлеге чул берип ругьдан тюшмежекге инанагъаныбызны де билдиребиз. Яшлагъа билим беривге оьмюрюню аслам пайын ба­гъышлагъан, оьзлени ишин яхшы билеген, яшав ёлда бир сайлагъан саниятгъа амин кюйде къалып кёп йыллар загьмат тёгеген, олай да оланы бай иш сынавуна аркъа таяп чалышагъан яш муаллимлени бирдагъы да къутлайбыз. Бизин гьар къайсыбызны къысматында да айрыча ер тутагъан, оьз­лерден уьлгю алмагъа къасткъылагъан муаллимлерибизге яхшы савлукъ, насип, кёп-кёп яхшылыкълар, гьар гюнлюк жанлы гьаракатында да уьстюнлюклер ёрайбыз. Къой, охувчу яшларыгъызны оьрлюклери себепли болуп, сизин сююнчюгюзге ёл ачылагъан гезиклер кёп болсун!


Авторизация
*
*
Регистрация
*
*
*
Согласны с условиями сайта?
Генерация пароля