Яшлар учун поликлиникалар къурулажакъ


Дагъыстанда эркин кюйде яшланы савлугъуну гьайын этмек учун поликлиникалар, оланы аврувларын бакъмагъа бир-бир бёлюклер етишмейгенни гьакъында халкъ арада лакъыр юрюлюп тура. Шо масъалаланы да гёз алгъа тутуп, бу йыл яшланы поликлиникаларыны даражасын оьсдюрмек муратда, Дагъыстангъа 300 миллион манат акъча гёрсетилген. Шо гьакъда оьзюню сёйлевюнде Дагъыстанны савлукъ сакълав министри Жамалутдин Гьажиибрагьимов билдирди.


 


–Россияны «Медицина идараларыны яшлар учунгъу поликлиника бёлюклерин оьсдюрмек» деген программасын яшавгъа чыгъармакъ учун, Дагъыстангъа федерал бюджетден кёмек гьисапда 297, 7 миллион манат акъча гёрсетилген, – деди министр савлукъ сакълавну масъалаларына багъышлангъан генгешде.



Дагъыстанны савлукъ сакълав министри англатгъан кюйде, оьзлени министерлигинде тувулунгъан масъалагъа байлавлу тийишли программа гьазирленип тура. Шону аслу мурады – яшлагъа этилеген медико-санитар кёмекни сан янын гётермек, яшланы поликлиникаларын, медицина идаралардагъы гиччипавланы савлугъун тергейген бёлюклени артдырмакъ.



Жамалутдин Гьажиибрагьимов билдирген кюйде, 900 мингге ювукъ гиччипавлар яшайгъан Дагъыстанда бир сама типовой поликлиника ёкъ.



–Шолай гьал буса яшланы савлугъун багъывда четимликлеге тарыта ва гезигин къаравуллай­гъанланы санавун артдыра. Ондан къайры да, клиникаларда яшлар учун чинк де тарыкълы бёлюклени ачмагъа имканлыкълар да ёкъ.



Плангъа гёре яшланы поликлиникаларына юрюйгенлени санаву 3 керенге артгъан. Шо саялы да олар алагъан медицина кёмекни сан яны тёбенлеше бара. Шону учун уьч сама яшланы поликлиникасын къурмагъа тарыкъ, – деди министр оьзюню сёйлевюнде.




Авторизация
*
*
Регистрация
*
*
*
Согласны с условиями сайта?
Генерация пароля